Gŵyl Triban: Edrych ymlaen at 'barti go iawn'

Bydd Gŵyl Triban yn dechrau ar faes Eisteddfod yr Urdd am y tro cyntaf ddydd Iau.

Wrth ddathlu ei chanmlwyddiant, mae'r Urdd wedi disgrifio'r digwyddiad yn Ninbych fel "aduniad mwya'r ganrif".

Bydd tri llwyfan ar y Maes gydag ystod o artistiaid yn perfformio, gan gynnwys Adwaith, Tara Bandito, Bwncath, Yws Gwynedd a N'Famady Koyaté.

Bydd Eden hefyd yn perfformio ar noson ola'r ŵyl ddydd Sadwrn.

Dywedodd Siân Eirian, cyfarwyddwr Eisteddfod yr Urdd, bod yr ŵyl "yn ddatblygiad cyffrous" ac yn "gyfle i ni ddathlu'r holl elfennau o ddiwylliant Cymraeg".

'Dathliad go iawn'

Un sy'n gyffrous am y penwythnos yw Non Parry o'r grŵp pop Eden, sydd wedi disgrifio arlwy'r ŵyl fel "lein-yp anhygoel".

"Fyswn i'n dod yma i wylio bob un - os taswn i ddim yma yn perfformio fy hunan fyswn i bendant yn dod yma," meddai.

Fe fydd Non Parry yn perfformio gydag Eden nos Sadwrn

"'Dan ni really yn teimlo y dathliad yma, y 100 mlynedd ac mae'n mynd i fod fatha gŵyl go iawn yn yr haul gobeithio.

"Mae 'na ddathliad go iawn, parti go iawn - ac yn y lle gorau i gael parti.

"Mae e'n mynd i fod yn benwythnos i'w gofio."

'Datblygiad cyffrous'

Dywedodd Siân Eirian bod yr ŵyl yn "cynnig gwledd i bawb o bob oed".

Yn ogystal â'r gerddoriaeth, bydd Cwis Mawr yr Urdd nos Sadwrn yn profi gwybodaeth cyn-aelodau.

Bydd y band Adwaith hefyd yn perfformio nos Sadwrn

Wrth rannu ei chyffro am yr ŵyl, cyfeiriodd Siân at gynnal Jambori cynta'r Urdd ar y cyd â Dilwyn Price, sy'n adnabyddus am ei waith yn arwain Jamboris y mudiad.

"Pam wnes i a Dilwyn gynnal y Jambori cyntaf yn Rhyl yn 1988, doedden ni byth yn meddwl y bydden ni'n dod yn ôl at ein gilydd i gynnal un arall ar y Maes yn 2022."