Rhybudd am stormydd i'r canolbarth a'r de ddydd Sul

Mae'r rhybudd melyn mewn grym rhwng 13:00 a hanner nos ddydd Sul

Mae rhybudd y gallai stormydd o daranau daro rhannau helaeth o ganolbarth a de Cymru ddydd Sul, gan achosi llifogydd a thrafferthion i deithwyr.

Mae'r Swyddfa Dywydd wedi cyhoeddi rhybudd melyn sydd mewn grym rhwng 13:00 a hanner nos.

Maen nhw wedi diweddaru'r rhybudd am 11:30 ddydd Sul.

Roedd y rhybudd blaenorol mewn grym rhwng 00:00 a 18:00 ar gyfer pob sir yng Nghymru oni bai am Ynys Môn.

Yn ôl yr arbenigwyr fe allai llifogydd dwfn a dŵr sy'n llifo'n gyflym beryglu bywydau ac achosi difrod i eiddo.

Maen nhw hefyd yn rhybuddio bod yna bosibilrwydd o oedi neu ohirio teithiau bws a thrên yn sgil llifogydd a mellt.

Mae gwaith clirio wedi parhau yn nhref Cricieth wedi i oriau o law trwm achosi llifogydd yno ddydd Gwener.