Cymru'n 'barod am gêm anodd' yn erbyn Yr Iseldiroedd

Bydd meddyliau'r tîm cenedlaethol yn gorfod symud ymlaen o orfoledd cyrraedd Cwpan y Byd wrth wynebu'r Iseldiroedd nos Fercher.

Yn dilyn y golled yng ngêm agoriadol Cynghrair y Cenhedloedd yng Ngwlad Pwyl wythnos yn ôl, tîm Louis van Gaal bydd yr ymwelwyr yn Stadiwm Dinas Caerdydd.

Ond brin dridiau wedi perfformiad arwrol y tîm yn erbyn Wcráin i gyrraedd pencampwriaeth Cwpan y Byd am y tro cyntaf ers 1958, y disgwyl yw bydd wynebau newydd ymysg yr 11 a fydd yn cychwyn y gêm.

Er hyn, mae tîm hyfforddi Cymru wedi cydnabod y sialens wrth wynebu detholion rhif 10 y byd yn ôl FIFA.

• Dim ond 2,000 o docynnau i'r Wal Goch yn Qatar?

• Y Gymraeg a phêl-droed: 'Doedd hi ddim yn arfer bod fel hyn'

• Popeth sydd angen ei wybod am Gymru yn Qatar

'Bydd un neu ddau o newidiadau'

Yn ôl y cyn-ymosodwr rhyngwladol Malcolm Allen, sydd yn lais cyfarwydd yn sylwebu ar gemau pêl-droed Cymru, y disgwyl yw bydd rhai newidiadau i'r tîm a ddechreuodd yn erbyn Wcráin brynhawn Sul.

Er hynny, pwysleisiodd na fyddai'r tîm cenedlaethol eisiau colli'r record gartref presennol o 17 gêm heb golled yn Stadiwm Dinas Caerdydd.

Dywedodd ar bodlediad BBC Radio Cymru, Y Coridor Ansicrwydd: "Dwi'n meddwl ella doith Joe Morrell i mewn yn ôl, dwi'n meddwl hefyd ddoith Harry Wilson yn ôl i fewn.

"Dwi'n meddwl neith Brennan Johnson yn bendant ddechra', felly ia bydd un neu ddau o newidiadau ond dwi'm yn meddwl bydd llwyth a llwyth o newidiadau."

'Torchi ein llewys'

Wrth edrych ymlaen at y gêm dywedodd rheolwr Cymru, Robert Page ei fod yn llawn edmygedd o record rheolwr Yr Iseldiroedd, Louis Van Gaal.

"Byddwn yn torchi ein llewys, byddwn yn rhoi cynnig arni a bydd tîm yn cael ei ddewis i roi cynnig arni," meddai.

Roedd Robert Page yn llawn emosiwn y dilyn y fuddugoliaeth dros Wcráin brynhawn Sul

"Rydyn ni eisiau ennill gemau felly mae'n fater o gael y cydbwysedd yn iawn. Dydw i ddim eisiau bod yn y gystadleuaeth hon i wneud y rhifau i fyny ac ond agor allan ein chwaraewyr ifanc i'r lefel yma o wrthwynebydd.

"Rydyn ni eisiau ennill gemau pêl-droed, felly i wneud hynny mae angen i ni gael y cydbwysedd yn iawn.

"Ydy hi'n realistig i ofyn i rai o'n chwaraewyr hŷn i fynd yn ôl eto mor gyflym? Mae'n debyg na, os edrychwch chi'n ôl ar bwysigrwydd y gêm honno [yn erbyn Wcráin] a'r emosiwn.

"Roedd yn rhaid i'r bechgyn roi shifft i fewn, felly mae'n rhaid i ni fod yn barchus a dewis tîm yn unol â hynny, ond fe welwch chi gyfuniad.

"Rydym yn barod ar gyfer gêm anodd."