Llwyddiant i Lauren Price yn ei gornest broffesiynol gyntaf

Mae Lauren Price wedi ennill ei gornest broffesiynol gyntaf nos Sadwrn ar ôl curo Valgerdur Gudstensdottir.

Fe enillodd Price, 27, bob rownd allan o chwech yn Arena Wembley yn Lloegr.

Lauren Price oedd y person cyntaf o Gymru i ennill medal aur am focsio yn y Gemau Olympaidd pan wnaeth hynny yng ngemau Tokyo y llynedd.

Mae wedi ennill sawl gwobr arall ar hyd ei gyrfa, gan gynnwys gwobr Personoliaeth Chwaraeon y Flwyddyn BBC Cymru.

Wrth siarad â Sky News wedi'r ornest nos Sadwrn, dywedodd ei bod "wir wedi mwynhau" a'i bod yn "edrych mlaen i'w wneud eto".