Estraddodi dyn o’r Almaen sydd wedi'i gyhuddo o lofruddiaeth

Cafodd Tomasz Waga ei lofruddio yng Nghaerdydd ar 28 Ionawr, 2021

Mae dyn sy'n cael ei amau o lofruddiaeth yng Nghaerdydd wedi cael ei estraddodi o'r Almaen i'r DU a'i gadw yn y ddalfa gan Lys Ynadon Caerdydd.

Mae Hysland Aliaj, 31, wedi'i gyhuddo o lofruddio Tomasz Waga, 23, ar 28 Ionawr 2021.

Cafodd corff Mr Waga ei ddarganfod gan aelod o'r cyhoedd yn ardal Pen-y-lan.

Fe gafodd Mr Aliaj ei arestio yn Yr Almaen cyn cael ei estraddodi dechrau Mehefin.

Bydd Hysland Aliaj yn ymddangos yn Llys y Goron Caerdydd ar 22 Gorffennaf.

Mae wedi'i gyhuddo o lofruddiaeth, achosi niwed corfforol difrifol a chynllwynio i gynhyrchu canabis.

Mae pedwar dyn arall eisoes wedi'u cyhuddo yn ymwneud â llofruddiaeth Mr Waga.