Gemau'r Gymanwlad: Efydd i Geraint Thomas ar ôl disgyn yn gynnar

Bu'n rhaid i Geraint Thomas fodloni ar fedal efydd ar ôl iddo ddisgyn yn gynnar yn y ras yn erbyn y cloc yng Ngemau'r Gymanwlad.

Roedd hi'n ymdrech arwrol gan y Cymro, wrth iddo geisio gwneud yr amser yn ôl wedi iddo ddisgyn o fewn ychydig funudau o ddechrau'r ras.

Rohan Dennis o Awstralia gipiodd y fedal aur, gyda'r Sais Fred Wright yn crafu heibio Thomas o ddwy eiliad i sicrhau'r arian.

Cyn y gemau fe ddywedodd Thomas mai'r ras yn erbyn y cloc oedd ei gyfle gorau am fedal.

Bydd hefyd yn cymryd rhan yn y ras ffordd ddydd Sul.

Mae Cymru wedi ennill 18 medal yng ngemau Birmingham hyd yma - pedair medal aur, pedair arian a 10 efydd.