Abersoch: Cludo dau i'r ysbyty ar ôl i gar syrthio dros ddibyn
- Cyhoeddwyd
Mae dau o bobl wedi cael eu cludo i'r ysbyty ar ôl i gar syrthio "cryn bellter" dros erchwyn dibyn ger Abersoch.
Cafodd tîm achub mynydd Aberglaslyn alwad i helpu Heddlu Gogledd Cymru tua 02:00 fore Sadwrn.
Roedd dau glaf wedi eu taflu allan o'r car, yn ôl y tîm achub. Cafon nhw eu symud i gae cyfagos.
Cafodd un claf ei gario i ambiwlans ac roedd y llall yn medru cerdded heb gymorth.
Cafodd y ddau eu cludo i Ysbyty Gwynedd. Does dim diweddariad ar gyflwr y cleifion.