Plaid Cymru yn gwahardd cynghorydd wedi llun 'pryderus'
- Cyhoeddwyd
Yn y neges, sydd bellach wedi'i dileu, mae'r Cynghorydd Scriven yn rhannu llun ohono'n sefyll ger y traeth
Mae Plaid Cymru wedi gwahardd cynghorydd a rannodd neges "senoffobig" ar y cyfryngau cymdeithasol lle mae'n ymddangos yn dal gwn.
Mewn neges i gyd-fynd â'r llun, dywedodd y Cynghorydd Jon Scriven, sy'n cynrychioli ward Penyrheol ar gyngor sir Caerffili, ei fod yn "gwneud yn siŵr nad oedd unrhyw Saeson yn ceisio croesi'r sianel".
Yn y neges Facebook ar 8 Awst, sydd bellach wedi'i dileu, mae'r Cynghorydd Scriven yn dweud: "Ogmore-by-Sea tonight for a quick swim and make sure there wasn't any English people trying to cross the channel."
Fore Mawrth fe ddywedodd Plaid Cymru bod y cynghorydd wedi'i wahardd o'r blaid ac mae Heddlu'r De bellach wedi cyhoeddi eu bod yn ymchwilio.
Fe wnaeth Jon Scriven ymddiheuro ar Facebook gan ddweud fod y neges yn "annoeth".
Gwahardd wrth ymchwilio
Dywedodd llefarydd ar ran Plaid Cymru bod "neges y Cynghorydd Scriven sydd bellach wedi'i dileu yn anaddas ac yn groes i farn a gwerthoedd Plaid Cymru".
"Mae'n ddyletswydd ar holl gynrychiolwyr etholedig Plaid Cymru i arfer y safonau uchaf," meddai.
"Mae'r Cynghorydd Scriven wedi'i wahardd o'r blaid wrth i ymchwiliad gael ei gynnal."
Mae cais wedi'i roi i'r Cynghorydd Scriven am ymateb.
Mae'r neges a'r llun gafodd ei rannu gan Jon Scriven bellach wedi cael eu dileu
Dywedodd Aelod Seneddol Llafur Caerffili Hefin David bod y llun yn "hynod o bryderus".
"Dylem fod yn ceisio uno pobl a mynd i'r afael â phryderon gwirioneddol fel costau byw, nid cyhoeddi delweddau sydd â'r bwriad o'n rhannu," ychwanegodd.
Ar Twitter dywedodd arweinydd grŵp y Ceidwadwyr Cymreig yn y Senedd Andrew RT Davies bod angen i Blaid Cymru weithredu.
"Mae hwn yn gynghorydd Plaid Cymru. Ni all Adam Price adael i sgandal arall fynd yn ei flaen heb gymryd camau pendant. Mae'r math yma o agwedd senoffobig islaw ni."
Galwodd y Democratiaid Rhyddfrydol Cymreig ar y Blaid i ddiarddel y cynghorydd gan ychwanegu: "Mae'n gwbl amhriodol i swyddog etholedig wneud sylwadau o'r fath, pan ddylen nhw wybod yn well.
"Gyda chymaint o gasineb mewn gwleidyddiaeth yn ystod y blynyddoedd diwethaf fe ddylen ni fod yn ceisio adeiladu pontydd, nid annog rhaniadau pellach.
"Rhaid i Blaid Cymru nawr wneud y peth iawn a diarddel y cynghorydd dan sylw."
Ymddiheuriad
Yn dilyn y feirniadaeth, fe wnaeth Jon Scriven rannu neges ar Facebook fore Mawrth yn ymddiheuro.
Dywedodd yn y neges: "Hoffwn ymddiheuro am unrhyw dramgwydd gafodd ei achosi gan fy neges Facebook sydd bellach wedi ei ddileu.
"Roedd yn annoeth a dwi wedi ymddiheuro i arweinydd y grŵp Lindsay Whittle sydd wedi derbyn fy ymddiheuriad."
Dywedodd Heddlu De Cymru eu bod yn "ymwybodol o neges ar gyfryngau cymdeithasol yn cynnwys dyn yn arddangos beth sy'n edrych fel reiffl yn Aberogwr".
"Mae honiad o gyfathrebiadau maleisus wedi cael ei adrodd i ni ac rydym yn ymchwilio i'r mater," meddai'r Uwcharolygydd Michelle Conquer.