3 Llun: Lluniau pwysicaf Tanwen Cray

Os fyddai'n rhaid i chi ddewis tri llun sydd yn cynrychioli eich bywyd chi, pa luniau fydden nhw?

Dyma ddewis cyflwynydd tywydd S4C, Tanwen Cray.

Pedair cenhedlaeth

Dyma lun pwysig iawn, iawn i fi, a fe wnai ei drysori am byth. Mam-gu Tŷ Clyd, Mami, Efa fy chwaer, fi, a fy merch Neli.

O'dd y llun yma yn bwysig i fi ers i ni dynnu'r llun 'nôl ym mis Ebrill, ond mae hyd yn oed yn bwysicach i fi ers bu farw mam-gu yn 94 oed ar ddydd Sadwrn cynta'r Eisteddfod eleni.

Odd hi'n garedig, yn ddoniol, ac yn llawn cariad.

Dyma'r llun ola gafodd ei dynnu o'r pump ohonom ni.

Llun cyntaf fel teulu o dri

Llun arall sy'n bwysig i fi yw'r llun yma. Hwn odd y llun cynta o'r tri ohonom ni fel teulu.

Fi, Ollie, a Neli Meillionen Awen. Ganwyd Neli ar 31 Ionawr 2024. Roedd y dyddiad 31 yn bwysig i fi ac Ollie gan taw dyna'r rhif mae Ollie wedi'i wisgo ar ei grys pêl-droed ers iddo ddechrau chwarae.

Mae e wedi symud i Wigan dechrau'r tymor yma, ac wedi gofyn i gael gwisgo'r rhif 31 - er mae hyn yn anarferol iawn i bêl-droediwr gan mai rhif isel maen nhw fel arfer eisiau!

Fe wnaethon ni enwi Neli ar ôl fy hen Fam-gu i, Nellie, sef mam Mam-gu Tŷ Clyd, a fe wna i byth anghofio gweld Mam-gu yn llefain o hapusrwydd yn cael gwybod beth oedd enw Neli am y tro cynta' - yr unig dro i fi erioed weld Mam-gu yn llefain.

Priodas ffrind bore oes

Ac yn ola, llun diweddar iawn, sydd yn bwysig i fi ar hyn o bryd.

Diwedd mis Awst es i i Ffrainc i briodas un o fy ffrindie cyntaf ac agosaf.

Roedd Megan a fi yn y feithrin gyda'n gilydd, Ysgol Gynradd Iolo Morganwg, a hefyd Ysgol Gyfun Bro Morgannwg gyda'n gilydd.

Er ein bod ni wedi byw yn bell iawn oddi wrth ein gilydd dros y blynyddoedd diwethaf, 'ni wedi aros mewn cysylltiad a fi wedi mwynhau cael cwrdd â James gyda Megan ym mhob parti pen-blwydd!

O'dd hi'n ddiwrnod llawn chwerthin a dawnsio, ond hefyd roedd yn emosiynol iawn gweld rhywun mor bwysig i fi yn priodi - jest fel o'dd y ddwy ohonon ni wedi breuddwydio dros y blynyddoedd.

O'dd hi'n ddiwrnod sbesial i gwpl sbesial - a o'dd Megan yn edrych yn biwtiffwl.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.