Siôn Tomos Owen yw Bardd Plant Cymru ar gyfer 2025-2027

Mae Bardd Plant Cymru yn cael ei benodi gan baneli o arbenigwyr ym meysydd llenyddiaeth ac addysg plant, dan ofal Llenyddiaeth Cymru

Y cyflwynydd, y darlunydd a'r awdur o Dreorci, Siôn Tomos Owen yw Bardd Plant Cymru ar gyfer 2025-2027.

Cafodd y cyhoeddiad ei wneud gan Lenyddiaeth Cymru mewn digwyddiad yn Llyfrgell Maesteg, Pen-y-bont ar Ogwr ddydd Mercher.

Mae Siôn Tomos Owen yn olynu Nia Morais yn y rôl, tra bod Nicola Davies yn camu i esgidiau Alex Wharton fel Children's Laureate Wales.

Dywedodd Mr Tomos Owen ei fod "am fagu'r creadigrwydd sydd ym mhob plentyn i greu".

Ers sefydlu rôl Bardd Plant Cymru yn 2000, mae 18 bardd wedi ymgymryd â'r swydd.

Y nod, yn ôl Llenyddiaeth Cymru, yw tanio dychymyg ac ysbrydoli plant Cymru drwy lenyddiaeth, ehangu mynediad plant a phobl ifanc at lenyddiaeth, cynyddu mwynhad plant o lenyddiaeth a chyfrannu at well llesiant meddyliol ymysg y genhedlaeth iau.

Yn y digwyddiad cyhoeddi ddydd Mercher fe ddarllenodd Bardd Plant Cymru a'r Children's Laureate Wales newydd eu cerddi cyntaf.

Fe gyflwynodd Nia Morais ac Alex Wharton gerddi cyfarch a geiriau o gyngor i'w holynwyr hefyd.

Sefydlwyd cynllun Children's Laureate Wales yn 2019, a Nicola Davies fydd y pedwerydd berson i ymgymryd â'r rôl

Mae Siôn Tomos Owen yn gweithio fel artist llawrydd creadigol yn darlunio, paentio murluniau a chynnal gweithdai creadigol.

Roedd yn un o gyflwynwr cyfresi 'Cynefin' a 'Pobol y Rhondda' ac mae wedi cyfrannu at amryw o raglenni eraill ar S4C dros y blynyddoedd.

Cyrhaeddodd ei gasgliad gyntaf o farddoniaeth, Pethau Sy'n Digwydd (Barddas) restr fer Llyfr y Flwyddyn 2025, a'i gyhoeddiad diweddaraf yw nofel i blant o'r enw Gerwyn Gwrthod a'r Llyfr Does Neb yn Cael ei Ddarllen (Atebol).

Mae ei farddoniaeth a'i straeon hefyd wedi eu cynnwys ar gwricwlwm newydd TGAU Cymraeg a Chymraeg ail iaith.

Wrth drafod ei obeithion ar gyfer y rôl, dywedodd: "Fel Bardd Plant Cymru dwi am fagu'r creadigrwydd sydd ym mhob plentyn i greu, creu cerddi, straeon neu ddarluniadau, y doniol a'r dwys, ac i ddefnyddio'r rhain i feithrin y diddordeb mewn darllen wnaeth gydio ynof fi pan roeddwn i'r un oedran."

'Cynlluniau uchelgeisiol'

Dywedodd Leusa Llewelyn, Cyfarwyddwr Artistig Llenyddiaeth Cymru: "I ddechrau, hoffai Llenyddiaeth Cymru ddiolch o waelod calon i Nia Morais ac Alex Wharton am eu gwaith caled dros ddwy flynedd.

"O gynnal gweithdai yng Ngharchar y Parc, i gynnal gweithdai rhithiol i grwpiau o bobl ifanc o Gymru ac ym Mhalesteina, i gerdded cannoedd o filltiroedd o ysgol i ysgol yn sir Fôn ac ym Mhowys... mae'r ddau wedi rhoi ymdrech arwrol i'w nod o ysbrydoli plant a phobl ifanc i feithrin cariad at eiriau a barddoniaeth.

"Yna estynnwn groeso cynnes iawn i'w holynwyr – Siôn Tomos Owen a Nicola Davies, sydd â chynlluniau uchelgeisiol am brosiectau am fyd natur a bywyd gwyllt, pwysigrwydd darllen ac ysgrifennu, a pharhau i deithio ledled Cymru yn lysgenhadon dros greadigrwydd.

"Mae'n fraint gennym i groesawu'r ddau i deulu Llenyddiaeth Cymru, a dymunwn bob lwc iddynt ar yr antur mawr sydd ar fin dechrau."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.