Pa rôl i'r Gymraeg wrth ddenu ymwelwyr i Gymru?

Rhoi hwb i'r iaith Gymraeg a'i diwylliant, a gwella profiad ymwelwyr yr un pryd.

Dyna ydy nod Cyngor Sir Conwy wrth iddyn nhw ymchwilio i farn busnesau ac ymwelwyr am y Gymraeg, a'r profiad maen nhw'n ei gael pan yn ymweld â'r sir.

Menter Iaith Conwy sy'n cydlynu'r ymchwil, a'r nod yn ôl Meirion Davies, prif weithredwr y fenter, ydy rhoi mwy o amlygrwydd i'r Gymraeg yn niwydiant twristiaeth y sir.

Dywedodd Mr Davies mai'r gobaith ydy "edrych ar faint o werth ydy'r Gymraeg yn gallu bod i'r diwydiant twristiaeth".

• Angen ail-frandio Cymru o 'ddefaid, glaw a rygbi'

"'Dan ni isio profi mewn ffordd, fod o o fudd a fod o'n rhywbeth positif fase pobl yn gallu ei weld i gryfhau y profiad naws am le pan ma' nhw'n dod draw i Gymru.

"Ond hefyd dwi'n meddwl bod o'n bwysig bod o'n edrych ar y marchnadoedd penodol lle mae pobl isio gweld a chlywed y Gymraeg.

"Siaradwyr Cymraeg er enghraifft, neu pobl sydd yn dysgu Cymraeg o ar draws y byd - dwi'n meddwl bod 'na botensial mawr i hynna hefyd."

Ychwanegodd: "Mae angen rhywbeth i 'neud i ni sefyll allan, dwi'm yn meddwl bod gan Gymru y pethau hawdd 'na fel sydd gan Iwerddon neu'r Alban.

"Ond mae o'n gyfle rŵan... i ail-frandio'n hunain a bod bach mwy hyderus am y Gymraeg."

"Mae'r Gymraeg yn bwysig iawn i ymwelwyr weld lle ma' nhw wedi dod," meddai Wyn Williams

Mae Wyn Williams yn cadw siop sglodion Tir a Môr yn Llanrwst. Mae'n credu bod gan y Gymraeg bwysigrwydd mawr, a bod twristiaid wrth eu boddau yn ei gweld a'i chlywed.

"Mae'r Gymraeg yn bwysig iawn i ymwelwyr weld lle ma' nhw wedi dod, i dref Gymraeg.

"De ni'n gwneud popeth - fel y fwydlen a phopeth sy'n mynd i fyny ar y waliau - yn ddwyieithog, wrth gwrs, ond Cymraeg yn gyntaf bob tro.

"Mae'r ymwelwyr yn ei weld o'n ddiddorol, dwi'n meddwl bod nhw'n licio bach o banter am y Gymraeg weithiau ac isio trio ambell i air Cymraeg felly."

'Isio amlygu Cymraeg Conwy'

Tebyg ydy profiad Sioned Davies o Siop Sioned yn Llanrwst, sy'n gwneud defnydd o'r iaith wrth werthu nwyddau i'r cartref.

"Mae 'na angen i Gymry Cymraeg sydd isio cynnyrch i'w cartrefi, ond hefyd twristiaid sy'n dod, mae gynnon nhw ddiddordeb i ddysgu ambell i air yma ac acw."

Ychwanegodd ei bod yn sicr wedi gweld cynnydd mewn diddordeb ac awydd i ddysgu mwy am yr hanes a'r iaith.

Mae Sioned Davies yn dweud ei bod wedi gweld cynnydd mewn diddordeb am gynnyrch iaith Gymraeg

Hyd yn hyn, mae busnesau yng Nghonwy wedi derbyn holiaduron fel rhan o'r ymchwil, gyda'r bwriad o "weithio hefo nhw yn y dyfodol i gryfhau", meddai Mr Davies.

Yn ogystal â rhai ymwelwyr gafodd eu holi, mae siaradwyr rhugl a dysgwyr hefyd wedi cael cyfle i roi eu barn. Mae pobl yn cael eu hannog i ateb holiaduron.

Gobaith Mr Davies ydy y bydd yr ymchwil yn arwain at gydweithio o fewn y sir i ddenu ymwelwyr o bob math.

"Mae gennych chi y twristiaid cyffredinol, dwi'n meddwl allwn ni ddefnyddio'r Gymraeg i roi profiad bach yn wahanol i bobl, ond mae gennych chi dwristiaeth lle mae pobl isio clywed y Gymraeg.

"Dwi'n gwybod, yn bersonol, os 'swn i'n mynd i ran wahanol o'r wlad, 'swn i isio mynd i rhywle lle dwi'n gallu clywed a gweld y Gymraeg."

• Treth ymwelwyr: Cefnogi cymunedau neu gam rhy bell?

Ychwanegodd: "O'r ymchwil dwi 'di 'neud hyd yn hyn, trafod 'efo grwpiau dysgwyr yn Lloegr, be' maen nhw'n d'eud ar hyn o bryd ydy y bysan nhw'n osgoi Conwy a mynd draw i Wynedd a Môn, achos bod nhw ddim yn gweld o fel lle mor Gymreigaidd.

"Ond wrth gwrs mae 'na lot fawr o Gymraeg yn Sir Conwy a mae isio amlygu hynny."

Mi fydd y gwaith ymchwil gan Menter Iaith Conwy yn para tan ganol Medi, ac wedyn bydd adroddiad manwl yn cael ei baratoi ar gyfer y cyngor sir.

Y disgwyl ydy y byddan nhw'n gweithredu ar yr argymhellion yn gynnar y flwyddyn nesaf.