Y Bencampwriaeth: Stoke 1-1 Abertawe

Bu'r Elyrch ar y blaen am dros 80 munud yn dilyn gôl gynnar Joël Piroe

Fe wnaeth dechrau sigledig Abertawe i'r tymor newydd barhau gyda gêm gyfartal oddi cartref yn Stoke nos Fercher.

Cafodd yr Elyrch y dechrau perffaith, wrth i Joël Piroe rwydo o groesiad Matthew Sorinola wedi dim ond chwe munud.

Roedd hi'n edrych fel pe bai'r ymwelwyr wedi gwneud digon i sicrhau'r fuddugoliaeth, cyn i Tyrese Campbell ei gwneud yn gyfartal wedi i'r cloc fynd heibio i 90 munud.

Bydd y canlyniad yn siom i Abertawe wedi iddyn nhw fod ar y blaen am dros 80 munud.

Bellach mae ganddyn nhw record o un fuddugoliaeth, tair gêm gyfartal a thair colled o'u saith gêm gyntaf yn y Bencampwriaeth.