Pennaeth Radio Cymru yn amddiffyn newid amserlen yr orsaf

Dafydd Meredydd

Fe wnaeth Dafydd Meredydd ei sylwadau mewn cyfweliad â rhaglen Newyddion S4C nos Fawrth

Mae pennaeth Radio Cymru wedi awgrymu nad ydy ffigyrau gwrando rhaglen Geraint Lloyd yn cynrychioli "gwerth am arian" i weddill cynulleidfa'r orsaf.

Cyhoeddwyd fis diwethaf mai Caryl Parry Jones fyddai cyflwynydd newydd slot rhaglen Geraint Lloyd ar BBC Radio Cymru.

Cafodd deiseb ei lansio yn sgil y penderfyniad i ddod â'r rhaglen i ben, ac mae protest wedi'i threfnu yn Aberystwyth ddydd Sadwrn.

Daeth hynny yn dilyn newidiadau i arlwy'r orsaf, a olygai y bydd rhaglenni Geth a Ger a Stiwdio, sy'n cael ei gyflwyno gan Nia Roberts, hefyd yn diflannu o fis Hydref.

Wrth siarad ar raglen Newyddion S4C, dywedodd pennaeth gwasanaethau Cymraeg BBC Cymru, Dafydd Meredydd nad oedd wedi'i synnu gyda'r ymateb i gael gwared ar raglen hwyr Geraint Lloyd.

Targedu'r 'gynulleidfa sydd ddim yn gwrando'

Dywedodd: "Dim o gwbl, dwi'n falch bod yr ymateb yna - mae'n dangos fod gwrandawyr Radio Cymru yn hapus i leisio'u barn. Maen nhw'n wrandawyr ffyddlon, triw.

"Ond hefyd mae'n rhaid i ni fod yn realistig ac mae'n rhaid i ni fod yn onest efo ni'n hunan. Efo'r wasgfa ariannol sydd o ran y ffi drwydded yn rhewi, o ran chwyddiant... mae'n rhaid i ni sicrhau gwerth am arian gora' i wrandawyr Radio Cymru."

Mewn ymateb i gwestiwn am a oedd wedi ailystyried y penderfyniad i ddiddymu rhaglen Geraint Lloyd yn sgil y ddeiseb, atebodd: "Gant y cant.

"'Da ni'n trafod hyn drwy'r amser ond hefyd pan 'da ni'n edrych ar y ffigyrau moel o ran faint o bobl sydd yn gwrando, dydy hynny ddim yn rhoi y gwerth am arian gora' i'r gynulleidfa ehangach ac mae'n rhaid i ni gofio hefyd am y gynulleidfa sydd ddim yn gwrando, a dyna fyddwn ni'n targedu rŵan."

Nid yw’r post yma ar X yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar X.
Nid yw'r BBC yn gyfrifol am gynnwys safleoedd allanol
I osgoi neges X gan Nia Roberts

Caniatáu cynnwys X?

Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X a pholisi preifatrwydd cyn derbyn. I weld y cynnwys yma dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Awgrymodd hefyd y byddai rhaglen gelfyddyddol yn cymryd lle rhaglen Stiwdio.

"Nid y ffigyrau gwrando ydy'r unig beth pan mae'n dod i'r celfyddydau, ond mae'n rhaid i ni gael rhyw fath o blatfform i'r celfyddydau yng Nghymru," meddai.

"'Da ni'n datblygu'r platfform newydd a'r fformat newydd a hynny ar ôl ymgynghori efo unigolion a sefydliadau o fewn y sector celfyddydau.

"Mae'n gyfnod cyffrous iawn," ychwanegodd.

Ddydd Mawrth hefyd, daeth cyhoeddiad mai Rhydian Bowen Phillips, Lisa Gwilym a Dom James fydd cyflwynwyr newydd Radio Cymru 2, wrth i'r gwasanaeth ymestyn ei oriau.

Pynciau cysylltiedig

Straeon perthnasol