'Mellten ar ôl mellten yn goleuo'r awyr'
- Cyhoeddwyd
Melltu dros Llanfairfechan
"Dwi erioed wedi gweld mellt fel yna o'r blaen."
Dyna fu ymateb llawer sy'n byw o Sir Benfro i Sir Fôn ar nos Fercher 19 Hydref. Roedd "y mellt yn dawnsio disgo" ac roedd hi'n "andros o sioe fellt" yn ôl rhai a brofodd tua dwy awr di-dor o'r awyr yn fflachio fesul eiliadau.
Dr Paula Roberts, uwch ddarlithydd yn Ysgol Gwyddorau Naturiol, Prifysgol Bangor sy'n egluro beth achosodd y storm anghyffredin o fellt a tharanau.
'Miloedd o fellt wedi'u cofnodi'
"Adra yn Llanberis" oedd Paula pan glywodd hi'r storm a oedd ar ei anterth yn yr ardal honno rhwng 10yh a hanner nos.
Eglura Paula: "Ddoth y gŵr adra o Gaernarfon a dweud 'Wannwl mai'n melltio allan.' Oedd yr awyr yn ddistop o fflachiadau doedd! Oedd o'n ddiddorol ac yn eitha anghyffredin i Gymru a'r pen yma o'r byd.
"Gyda'r patrwm tywydd ar hyn o bryd, rydan ni yn styc mewn system gymhleth iawn lle mae'n tynnu tywydd i fyny o'r de sy'n egluro pam y mellt neithiwr mewn ffordd - mae hi'n ddiwadd mis Hydref a mae hi dal reit gynnas.
"Be' ddigwyddodd oedd - mi dynnodd o'r stormydd yma fyny efo fo hefyd felly be' welson ni oedd pulse o stormydd a mellt a tharanau a glaw trwm yn pasio dros Gernyw, croesi Sir Benfro achos oedd 'na lot o luniau o Sir Benfro ar y gwefannau cymdeithasol, yna i fyny'r môr yn bennaf rhwng Cymru ac Iwerddon.
Caniatáu cynnwys X?
Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X, dolen allanol a pholisi preifatrwydd, dolen allanol cyn derbyn. I weld y cynnwys yma dewiswch ‘derbyn a pharhau’.
"Mi oedd 'na lot o fellt a tharanau jest i'r de o Ddulyn a wedyn mi ddoth o ar draws Pen Llŷn ac i fyny am Môn lle oedd o jest yn ddi-stop.
Mellt dros Sir Fôn o borth Trecastell
Mellt Aberffraw, Sir Fôn
Awyr Pentraeth, Sir Fôn
"Oedd 'na rai o'r mellt yn taro'r ddaear ond oedd 'na lot o felltio jest yn yr awyr hefyd - oedd o'n drawiadol. Dwin siŵr bod 'na filoedd o fellt wedi'u cofnodi ar rai o'r gwefannau cofnodi mellt.
"Yn fy ardal i yn Llanberis oeddan ni yn lwcus achos doedd na ddim mellt yn agos iawn i ni, ond ti'n edrych ar fapiau arlein a mi gafodd Pwllheli a Nefyn eu hamro efo mellt a tharanau.
Map arlein o Iwerddon, Cymru a gweddill Prydain yn cofnodi nifer y mellt/munud ychydig eiliadau ar ôl hanner nos ar 20 Hydref.
"Mi wnaeth o ffislo allan o gwmpas Ynys Manaw a wedyn erbyn bora 'ma mae o di mynd yn gyfan gwbl er iddi ddal felltio mymryn yn nwyrain Lloegr.
"Roedd o'n ddipyn o sioe, ac efo beth oedd yn mynd ymlaen yn San Steffan neithiwr - mae'n anodd penderfynu beth oedd fwyaf dramatig - y mellt ta San Steffan!"
'Fel noson tân gwyllt byd natur!'
Un arall gafodd ei wefreiddio gan y storm olau oedd cyflwynydd tywydd BBC Radio Cymru, Robin Owain.
Meddai: "O'n i'n edrych ar y mapiau ac yn dilyn y storm yn datblygu dros Fae Ceredigion, gan ryfeddu cynifer o fellt oedd yno. Wrth i'r storm symud tua'r gogledd dros Ben Llŷn, mi o'dd fflachiadau'r mellt i'w gweld yn yr awyr i'r de-orllewin o Gaernarfon.
Gwyliwch fideo Robin ohoni'n melltu dros Gaernarfon
"Fyny a fi i'r atig i wylio'r sioe - ac am sioe oedd hi! Ar ei hanterth, yn hanner awr dda siŵr o fod o fellten ar ôl mellten ar ôl mellten yn goleuo'r awyr yn las a phiws llachar. Dwi erioed wedi gweld na phrofi storm fellt a tharanau mor actif."
Ydy Cymru wedi arfer gyda stormydd mellt di-dor?
Gyda phobl ar y cyfryngau cymdeithasol yn honni nad oedden nhw erioed wedi gweld mellt tebyg o'r blaen, mae stormydd o'r fath yn fwy cyffredin ar lefel byd eang.
Yn ôl Paula: "Yn fyd eang dwi'n siŵr bod unrhyw un sydd wedi bod yn styc mewn un o'r stormydd 'ma mewn llefydd ychydig poethach yn y byd yn gyfarwydd â nhw.
"Dwi'n cofio bod yn Ffrainc un tro a gafon ni bwl o wbath tebyg yn fan'no - oedd hi jest yn melltio yn gyson. Ond mae o eitha' anghyffredin yn y rhan yma o'r byd achos fel arfar does yna ddim gymaint o egni yn yr atmosffer, ond mae yna ar hyn o bryd mae'n ymddangos.
"Dwi'n cofio gwario un haf gyfan ar Ynys Enlli. Oedd yna un noson yn fan'no lle o'n i'n ista yn gwylio rwbath tebyg i neithiwr yn pasio i fyny'r môr ond dydi o ddim yn rwbath 'dan ni yn weld yn aml iawn yng Nghymru, dim ar y lefel yma."
Mwy o'r awyr yn melltio, dreigio, llychedu neu'n twlu gole...
Mellt dro y Gogarth a glannau Llandudno
Melltu dros darfarn y Douglas, Bethesda
Melltu dros Gaeathro
Mellten Llanfairfechan
Hefyd o ddiddordeb: