Dan Biggar yn symud o Northampton i Toulon

Ymunodd Dan Biggar â Northampton o'r Gweilch yn 2018

Mae maswr Cymru Dan Biggar wedi ymuno â chlwb Toulon yn Ffrainc, gan symud yno'n syth ar ei gais ei hun.

Roedd y chwaraewr 33 oed eisoes wedi datgan y byddai'n gadael Northampton Saints ar ddiwedd tymor 2022-23.

Ond daeth cadarnhad ddydd Gwener y bydd yn ymuno â'i gyd-chwaraewyr newydd ar ôl gemau Cyfres yr Hydref.

Ni fydd yn cymryd rhan yng ngemau Cymru dros yr wythnosau nesaf oherwydd anaf.

• Dyer i ennill ei gap cyntaf yn erbyn Seland Newydd

Mewn pum mlynedd gyda'r Seintiau, fe chwaraeodd 69 o weithiau ac roedd ei gêm olaf yn y fuddugoliaeth yn erbyn Wasps yn y gynghrair ddechrau Hydref.

Dywedodd nad oedd wedi rhagweld gadael Northampton yng nghanol y tymor "ond fe gododd y cyfle yma'n sydyn iawn".

Ychwanegodd: "Fe wnes i fy mhenderfyniad gyda dyfodol tymor hir fy nheulu mewn golwg."

Fe gafodd ei brofion meddygol yr wythnos hon ac mae prif weithredwr Northampton wedi dymuno'n dda iddo, gan ei ddisgrifio fel chwaraewr "o'r radd flaenaf".

Biggar yw'r chwaraewr diweddaraf o Gymru i chwarae yn Ffrainc, gan ddilyn Gavin Henson, Leigh Halfpenny a Gethin Jenkins.

Mae wedi cael 103 o gapiau rhyngwladol, gan gapteinio'i wlad yn ystod pencampwriaeth Chwe Gwlad eleni a'r daith haf yn Ne Affrica.