Pedwar rysait rhad i'ch cynhesu gaeaf yma
- Cyhoeddwyd
Sglodion ag ŵy o'r popty
Mae'r gaeaf wedi cyrraedd ac mae costau bwyd ar gynnydd felly dyma restr cyflym o ryseitiau rhad a syml i'ch cysuro.
Mae'r awdur Rhian Cadwaladr yn hen law ar goginio yn y cartref ac wedi rhyddhau llyfr ryseitiau 'Casa Cadwaladr' yn ddiweddar. Gyda'r esgid yn gwasgu a'r gwynt yn fain, dyma ambell rysait i wneud pethau ychydig yn haws.
Lobsgows
Lobsgows
Mae'n werth edrych yn ôl ar ryseitiau'r gorffennol i ddarganfod ffyrdd o wneud bwyd rhad a dyma i chi un sydd wedi goroesi'r blynyddoedd - lobsgows, neu cawl yn y de.
Mae hwn yn gwneud digon i chwech efo rhywfaint dros ben at y diwrnod canlynol pan fydd o'n neisiach fyth!
Cynhwysion:
• 500g cig eidion wedi ei dorri'n gwibiau
• 3 taten fawr
• 1 nionyn
• 1 cennin
• 2 foronen
• 2 banas
• 1 rwdan fach
• Perlysiau ffresh neu sych e.e. deilen lawryf (bay leaf) teim, parsli, rosmari
• Halen a pupur
Dull:
1. Rhowch y cig mewn sosban fawr a'i orchuddio efo dŵr
2. Codwch i'r berw. Wrth i chi wneud hyn fe welwch lysnafedd (scum) yn berwi i'r wyneb, tynnwch o efo llwy dyllog
3. Tra mae'r cig yn codi i'r berw darparwch y llysiau - pliciwch a thorrwch y moron, panas a'r rwdan yn ddarnau tua yr un maint
4. Torrwch y nionun yn fân a golchwch a sleisiwch y cennin
5. Pliciwch y tatws a'u torri yn ddarnau o leiaf ddwy waith maint gweddill y llysiau
6. Rhowch y llysia, perlysia yn y sosban efo chydig mwy o ddwr i'w gorchuddio
7. Trowch y gwres i lawr a'i fudferwi am rhyw ddwy awr i ddwy awr a hanner nes fod y cig yn frau
8. Blaswch ac ychwanegwch halen a phupur at eich dant
Carbonara efo madarach a/neu ham
Carbonara
Os am bryd rhad sydd yn eich llenwi chewch chi fawr ddim rhatach na pasta. Dyma rysait y medrwch chi addasu i beth sydd ganddoch chi - er engraifft, defnyddiwch fadarch yn lle ham.
Digon i 4.
Cynhwysion:
• Ychydig o fenyn i ffrîo garlleg
• 2 dafell o ham
• 2-3 clôf garlleg wedi dorri'n fân
• 400g pasta - spagehetti/ linguini neu tagliatelle
• 3 ŵy
• Halen a phupur
• Llond dwrn o gaws parmesan wedi gratio yn fân
Dull:
• Rhowch y pasta mewn sosban o ddŵr berw ar y stôf. Edrychwch ar y paced i weld faint yn union mae o angen i goginio
• Towddwch y menyn mewn padell ffrîo a ffrîwch y madarch a'r garlleg ynddo
• Tra mae popeth arall yn coginio rhowch yr wyau mewn jwg a'u curo'n dda. Ychwanegwch hanner y caws parmesan i'r jwg
• Pan mae'r spaghetti a'r madarch yn barod gwagiwch y dŵr o'r spaghetti gan gadw rhyw lond llwy fwrdd ar ôl
• Rhowch y madarch, ham a'r wyau/caws ar ei ben a'u cymysgu'n dda. Mi fydd gwres y spaghetti yn coginio'r ŵy ond peidiwch a'i roi yn ôl ar y stôf neu mi gewch ŵy wedi sgramblo
• Ychwanegwch ddigon o bupur du - a halen os oes angen
• Rhowch mewn powleni efo gweddil y parmesan wedi ei daenu drosto
Sglodion ag ŵy yn y popdy
Sglodion ag ŵy o'r popty
Mae olew wedi mynd i fyny yn eithriadol yn ei bris yn ddiweddar ac mae angen cryn dipyn ohono i wneud chips. Dyma i chi ffordd rhatach sydd hefyd yn golygu llai o olchi llestri!
Digon i ddau.
Cynhwysion:
• 2 daten fawr
• 4 tomato
• 2 ŵy
• 2 fadarch mawr
• Ychydig o olew
• Dail teim os oes ganddo chi beth
• Halen a phupur du
Dull:
1. Rhowch y popdy ymlaen ar 180c ffan
2. Pliciwch y tatws a'u torri yn sglodion. Rhinsiwch mewn dŵr oer a'u sychu mewn lliain glan
3. Rhowch y tatws mewn tun rhostio mawr. Ni ddyliai'r tatws lewni'r tun
4. Gwasgarwch ddail teim dros y tatws
5. Tywalltwch ychydig o olew drostynt a'u trochi yn dda a'u rhoi yn y popdy am ddeg munud
6. Tynnwch y tun o'r popdy, rhoi ysgwytwad iddyn nhw ac yna gosod y tomatos a'r madarch yn eu plith gan daenu ychydig olew drostynt hwythau
7. Coginiwch nhw am rhyw hanner awr arall a pan eu bod yn edrych ddim ymhell o fod yn barod tynnwch y tun o'r popdy
8. Gwthiwch gynnwys y tun o'r neilltu i wneud lle i fedru gollwng dau ŵy yn eu canol
9. Torrwch yr ŵy i gwpan gyntaf a'u gollwng yn ofalus i'r tun
10. Rhowch y tun yn ôl yn y popdy am rhwy 8 munud arall nes fod y gwynwy wedi setio
11. Tasgwch halen cras a pupur du dros y cyfan
Kedgeree eog
Kedgeree eog
Dyma i chi ffordd o wneud i ychydig o eog fynd ymhell.
Digon i 2.
Cynhwysion:
• 1 darn o eog
• 1 lemwn
• 125g o reis basmati
• 3 ŵy wedi ei ferwi
• 1 nionun bach wedi ei falu'n fân
• Lwmpyn o fenyn i ffrïo
• 1 llond llwy fwrdd o bowdwr cyri
• 1/4 llwy o bowdwr turmeric
• Llond dwrn o swltanas
• Halen a pupur
• Coriander wedi ei falu'n fân os oes ganddoch chi beth
Dull:
1. Rhowch y popdy ymlaen ar 200c /180c ffan/ nwy 6
2. Tynnwch groen yr eog a rhowch o mewn tun rhostio
3. Torrwch y lemwn yn ei hanner ar ei hyd a gwasgwch sudd un hanner dros yr eog
4. Rhowch haenen o ffoil dros y tun a'i bobi am oddeutu 14 munud nes ei fod yn barod
5. Rhowch y reis i ferwi yn ôl y canllawiau ar y paced
6. Berwch y wyau am ddeg munud
7. Tra mae'r wyau yn berwi toddwch y menyn mewn padell fawr a ffriwch y nionun ar wres isel
8. Cymysgwch y powdwr cyri a'r turmeric i fewn i'r nionun ac ychwanegu y reis wedi goginio
9. Torrwch un ŵy yn fân a sleisiwch y llall yn chwarteri
10. Torrwch yr eog yn haenau a'i ychwanegu i'r reis efo'r swltanas, yr ŵy sydd wedi ei falu'n fân a'r coriander
11. Ychwanegwch halen a pupur at eich dant a gosod gweddill yr wŷ a'r hanner lemwn (wedi ei dorri'n ddau ddarn)