Y Gynghrair Genedlaethol: Wrecsam 2-0 Aldershot
- Cyhoeddwyd
James Jones a sgoriodd yr ail gôl i'r Dreigiau
Roedd yna fuddugoliaeth arall i'r Dreigiau ddydd Sadwrn a hynny wedi iddyn nhw drechu Aldershot yn y Gynghrair Genedlaethol.
Roedd Wrecsam yn chwarae gyda hyder tîm sydd yn ennill gartref a chefnogaeth o dros ddeg mil o gefnogwyr.
Ar ôl 28 munud fe rwydodd Paul Mullin gôl gampus - gan wibio heibio'r amddiffyn ac yna codi'r bêl yn grefftus dros y gôl geidwad.
Ymhen deg munud roedd na gôl arall i Wrecsam - ergyd Mullin yn cael ei throi i'r rhwyd gan James Jones.
Roedd yna sawl cyfle da i fynd ymhellach ar y blaen.
Roedd Aldershot yn barod iawn i ymosod yn sydyn ond doedd na'r un gôl i'r ymwelwyr.
Gan fod Notts County wedi cael gêm gyfartal yn erbyn Yeovil fe ddychwelodd Wrecsam i frig y Gynghrair Genedlaethol.