Atal gwaith dau safle dur yng Nghymru yn 'ergyd anferth'

Bydd y newidiadau'n cael effaith ar 440 o swyddi ar draws y DU - 150 o'r rheiny yng Nghymru

Mae cynlluniau i atal y gwaith mewn dau o safleoedd Liberty Steel yng Nghymru yn "ergyd anferth" i'r gweithlu, yn ôl undeb.

Mewn datganiad dywedodd y cwmni y byddai'n "atal" ei safleoedd yng Nghasnewydd a Thredegar fel rhan o waith ailstrwythuro'r busnes.

Galwodd Community - undeb y gweithwyr dur - am "ymgynghoriad ystyrlon" ar y cynlluniau, fydd yn cael effaith ar 440 o swyddi ar draws y DU.

Mae 120 o'r swyddi hynny yng Nghasnewydd, a 30 yn Nhredegar.

Yn ôl Liberty Steel bydd y newidiadau yn sicrhau "ffordd hyfyw ymlaen" i'r busnes, ac fe fydd unrhyw un sy'n cael ei effeithio yn cael cynnig swyddi eraill.

Mae Liberty Steel wedi wynebu trafferthion ariannol ers i'w ariannwr, Greensill Capital, fynd i'r wal

Mae'r cwmni hefyd yn atal y gwaith ar ei safle yn West Bromwich yng nghanolbarth Lloegr, a bydd y gweithlu yn Rotherham ar gyrion Sheffield yn cael ei leihau.

Mae Liberty Steel wedi wynebu trafferthion ariannol ers i'w ariannwr, Greensill Capital, fynd i'r wal.

Ond fe ddaeth y cyhoeddiad ddydd Iau fel sioc i weithwyr a'u hundeb.

Galw ar Lywodraeth y DU i weithredu

Dywedodd swyddog cenedlaethol Community, Alun Davies, na allai'r staff fod wedi gwneud mwy i gefnogi'r cwmni trwy'r trafferthion diweddar.

"Ers i Greensill Capital fynd i'r wal mae'r undebau llafur wedi cefnogi'r cwmni am ein bod yn credu mai cyflawni ei gynlluniau busnes... oedd y ffordd orau i ddiogelu swyddi a dyfodol y busnes," meddai.

Dywedodd nad oedd y cynlluniau hynny yn cynnwys atal gwaith mewn unrhyw safleoedd.

"Mae'n gyfnod anodd i'r diwydiant dur ond mae penderfyniad y cwmni i newid eu cynlluniau a chyhoeddi strategaeth sy'n seiliedig ar doriadau yn ergyd anferth," meddai Mr Davies.

"Mae angen ymgynghoriad ystyrlon ar y cynlluniau yma, a bydd yr undebau yn craffu ar y cynlluniau i atal y gwaith yng Nghasnewydd, West Bromwich a Thredegar."

Galwodd Mr Davies hefyd ar Lywodraeth y DU i "weithredu er mwyn cael y prisiau ynni cystadleuol sydd ei angen yn daer ar ein diwydiant".

Dywedodd Llywodraeth y DU ei fod wedi ymrwymo i sicrhau "dyfodol cynaliadwy" i'r sector.

Yn ôl llefarydd y Prif Weinidog Rishi Sunak, mae'r newyddion yn "bryderus", ond dywedodd y bydd gweinidogion yn "parhau i gynnig cefnogaeth sylweddol" i'r diwydiant.