Y Gynghrair Genedlaethol: Maidstone 2-3 Wrecsam
- Cyhoeddwyd
Taith i dde ddwyrain Lloegr oedd yn wynebu'r Dreigiau ddydd Sadwrn ac mewn llai na hanner awr roedd Wrecsam ar y blaen.
Luke Young sgoriodd. Wedi i ymgais Paul Mullin gael ei harbed daeth y bêl at draed Young, 25 llath o'r gôl, ac fe rwydodd yn rymus.
Daeth cyfle i Paul Mullin sgorio ei chweched gôl ar hugain wedi i'r Dreigiau gael cic o'r smotyn ar ôl awr o chwarae ac fe rwydodd gan ddyblu mantais Wrecsam.
Fe ddaeth y tîm cartref yn ôl i'r gêm yn yr ail hanner - gôl i Jack Barham ar ôl 72 munud ac yna fe sgoriodd ail gôl gan ddod â'i dîm yn gyfartal ar ôl 79 munud.
Y tîm cartref fu'n pwyso wedi hynny ac roedd Wrecsam yn ceisio dal gafael yn y gêm.
Ond yn y funud olaf fe sicrhaodd Aaron Hayden gôl arall i Wrecsam - y cefnwr yn sgorio gôl hanfodol i'w dîm.
Er nad oedd Notts County yn chwarae oherwydd y tywydd, parhau yn ail yn y Gynghrair Genedlaethol ar gyfanswm goliau y mae Wrecsam ond gyda gêm wrth gefn o hyd.