Y Bencampwriaeth: Abertawe 2-0 Bristol City

Y Cymro Liam Cullen, 23, oedd sgoriwr gôl agoriadol Abertawe

Fe wnaeth goliau gan Liam Cullen ac Olivier Ntcham sicrhau buddugoliaeth gyntaf mewn saith gêm i Abertawe brynhawn Sul.

Yn dilyn rhediad gwael diweddar yn y Bencampwriaeth, llwyddodd yr Elyrch i gadw llechen lân am y tro cyntaf ers mis Rhagfyr wrth drechu Bristol City.

Bu bron iddyn nhw gael y dechrau perffaith wedi ond 17 eiliad, wrth i ergyd Joel Piroe fflachio heibio i gôl yr ymwelwyr.

Er i'r Elyrch reoli'r meddiant yn llwyr yng nghyfnod agoriadol y gêm, cael a chael oedd hi i greu cyfleoedd clir.

Tarodd Mark Sykes ergyd i Bristol City yn syth i lawr corn gwddf golwr Abertawe Andy Fisher wedi 23 munud, wrth i'r ymwelwyr hefyd chwilio am gôl agoriadol.

Olivier Ntcham oedd sgoriwr yr ail yn Stadiwm Swansea.com

Daeth Harry Darling yn agos i Abertawe gyda pheniad gafodd ei arbed gan Max O'Leary, cyn i'r golwr hefyd rwystro Liam Walsh ar yr ail gynnig.

Ond y tîm cartref aeth ar y blaen ar yr egwyl wrth i bas Olivier Ntcham ganfod Liam Cullen, gyda'r Cymro'n ergydio ar ei droed chwith i gornel isa'r rhwyd ar gyfer ei seithfed gôl y tymor hwn.

Ar ddechrau'r ail hanner fe gafodd Piroe a Cullen gyfleoedd pellach, gyda Piroe yn taro'r postyn gydag un peniad.

Ond roedd Bristol City yn dal i fygwth, gydag ergyd Omar Taylor-Clarke - yn enedigol o Gasnewydd - yn mynd yn syth at Fisher, tra bod amddiffynnwr Abertawe Ben Cabango yn lwcus i osgoi cael ei gosbi am lawio.

A gyda 13 munud yn weddill cafodd y fuddugoliaeth ei sicrhau gan Ntcham, wrth iddo droi un ffordd a'r llall yn y cwrt cosbi a tanio i gefn y rhwyd.