Wyth injan dân ar y ffordd i Wcráin o dde Cymru

Dyma fydd y pumed tro i fflyd o beiriannau tân gael eu cludo i Wcráin o'r DU

Ben bore Mawrth, bydd wyth o beiriannau tân, ynghyd ag offer arbenigol, yn dechrau'r daith o dde Cymru am y ffin rhwng Gwlad Pwyl a Wcráin.

Ers dechrau'r rhyfel yno, mae dros 80 injan dân wedi eu cyfrannu gan y Deyrnas Unedig er mwyn bod o gymorth i wasanaethau brys, sy'n gweithio dan amodau hynod anodd ar faes y gad.

Dyma fydd y pumed tro yn ystod y flwyddyn ddiwethaf i fflyd o beiriannau tân gael eu cludo i Wcráin o'r DU.

Mae nifer sylweddol y tro hwn - wyth injan dân a nifer o offer - yn rhoddion gan Wasanaeth Tân ac Achub De Cymru.

Bydd 24 o swyddogion yn gwneud y daith at y ffin rhwng Wcráin a Gwlad Pwyl

Mae'n daith o bum diwrnod a dros 1,300 o filltiroedd.

Bydd 24 o swyddogion yn gwneud y daith, a bydd seremoni i drosglwyddo'r offer ar y ffin rhwng Wcráin a Gwlad Pwyl.

Dywedodd Rhydian Jones fod "rhaid i ni wneud rhywbeth i helpu"

"Mae wyth peiriant 'da ni sydd wedi dod at ddiwedd eu hamser yn ne Cymru, a bydd yr wyth yn mynd mas i Wcráin gyda nifer o offer sydd hefyd wedi dod at ddiwedd eu hoes yma," meddai Rhydian Jones o Wasanaeth Tân ac Achub De Cymru wrth Newyddion S4C.

"Ni'n hala'r peiriannau yma, yr offer torri, offer anadlu, a'r wisg ni'n iwso bob diwrnod - beth ni'n galw'n fire kit.

"Os ni'n colli diffoddwr tân mewn unrhyw ddamwain, ni gyd yn teimlo fe.

"So i weld y diffoddwyr tân mas yn Wcrain, a gweld be' maen nhw'n mynd trwyddo, mae'n rhywbeth mae'n rhaid i ni wneud i helpu."

Prin y mae gwaith y diffoddwyr yn cael ei gydnabod, meddai un o ASau Wcráin

Ers dechrau'r rhyfel mae degau o ddiffoddwyr wedi'u lladd yn Wcráin, a tua 100 o orsafoedd tân a 250 o beiriannau wedi'u dinistrio yn y brwydro.

Mae Newyddion S4C wedi siarad ag un Aelod Seneddol yn Wcráin sydd, ar ôl ymosodiadau diweddar yn dweud bod angen y cymorth nawr gymaint ag erioed.

Prin y mae gwaith y diffoddwyr yn cael ei gydnabod, meddai Kira Rudyk.

"Pan dy'n ni'n derbyn rhoddion caredig fel hyn, mae'n rhoi gobaith i ni," meddai Kira Rudyk

"Dydyn ni ddim yn gwybod ble bydd y taflegryn nesaf yn taro," meddai.

"Dyma pam dy'n ni angen nifer o beiriannau tân, ym mhob dinas yn Wcráin.

"Mae'r peiriannau hyn yn rhoi help i'n gwasanaethau brys, sy'n ceisio defnyddio pob eiliad posib er mwyn achub bywydau, a'u galluogi nhw i fod yno ar amser.

"Mae angen yr offer er mwyn mynd trwy'r rwbel a rhoi siawns i bobl oroesi, er gwaethaf ymdrechion Rwsia.

"Pan dy'n ni'n derbyn rhoddion caredig fel hyn, mae'n rhoi gobaith i ni."