Babi wedi marw yn dilyn achosion o heintiadau enterofeirws

Mae Iechyd Cyhoeddus Cymru'n ymchwilio wedi clwstwr o achosion myocarditis sydd wedi arwain at farwolaeth un babi.

Dywedodd ICC fod achosion o heintiadau enterofeirws difrifol wedi datblygu llynedd ymhlith babanod ifanc yn y de.

Bellach mae un babi wedi marw, gydag un arall yn yr ysbyty o hyd, ac wyth arall yn parhau i dderbyn triniaeth.

Ond ychwanegodd y corff iechyd eu bod am roi "sicrwydd" i rieni mai "nifer fach iawn o achosion" oedd wedi codi.

'Dysgu gwersi'

Fe wnaeth yr achosion o heintiadau enterofeirws difrifol gyda myocarditis (llid ar gyhyr y galon) ddatblygu rhwng Mehefin a Thachwedd 2022, mewn babanod oedd lai na 28 diwrnod oed.

Yn ôl ICC mae enterofeirws yn haint cyffredin yn ystod plentyndod, ond yn un sy'n anaml iawn yn effeithio ar y galon, a bod y rhan fwyaf o fabanod a phlant "yn gwella'n llwyr".

Ond yn achos y clwstwr hwn fe wnaeth 10 o fabanod ddatblygu salwch difrifol, ac mae un bellach wedi marw o ganlyniad.

"Mae'r clwstwr yn anarferol oherwydd nifer yr achosion a nodwyd o fewn amser byr," meddai Dr Christopher Williams, Epidemiolegydd Ymgynghorol gydag Iechyd Cyhoeddus Cymru.

Mae Iechyd Cyhoeddus Cymru'n gweithio'n agos gyda'r tîm pediatrig yn Ysbyty Plant Cymru

"Felly mae ymchwiliadau'n mynd rhagddynt bellach ar y cyd â'r tîm pediatrig yn Ysbyty Plant Cymru, er mwyn deall y rhesymau pam ac i ymchwilio i unrhyw achosion pellach y gellir eu nodi yn yr wythnosau a'r misoedd i ddod.

"Dylid rhoi sicrwydd i rieni, er y bu cynnydd mewn achosion, bod hwn yn dal i fod yn ddigwyddiad prin iawn."

Ychwanegodd Gweinidog Iechyd Cymru, Eluned Morgan ei bod hi'n "cydymdeimlo â phob un" o deuluoedd y plant hynny, ond bod achosion "yn brin iawn o hyd".

"Mae gan Gymru system wyliadwriaeth dda ar waith ar gyfer enterofeirws," meddai.

"Rydym yn cymryd rhan mewn astudiaeth glinigol i ddeall yr achosion hyn ymhellach a dysgu gwersi, gan gynnwys newidiadau yn y modd y mae heintiau'n cylchredeg ac imiwnedd y boblogaeth yn dilyn y pandemig."

Ychwanegodd y Gweinidog Iechyd fod ICC bellach wedi rhoi gwybod i Sefydliad Iechyd y Byd am y sefyllfa, "o ganlyniad i natur anghyffredin a difrifol yr achosion".