Pum munud gyda Debra Drake o The Great British Sewing Bee
- Cyhoeddwyd
Cyrhaeddodd Debra rownd derfynol The Great British Sewing Bee yn 2022
Mae Debra Drake yn wyneb cyfarwydd i ffans y gyfres The Great British Sewing Bee, wedi iddi gyrraedd rownd derfynol y gyfres boblogaidd nôl yn 2022.
Wythnos ar ôl wythnos, roedd Debra - sy'n wreiddiol o Benmachno ond sydd bellach yn byw yn Llanfairfechan - yn plesio'r beirniaid a'r gynulleidfa gyda'i dyluniadau dyfeisgar a'i chrefftwaith cywrain.
Ar drothwy cyfres newydd, cafodd Cymru Fyw sgwrs gyda hi am ei chariad tuag at wnïo, ei phrofiad ar y rhaglen a sut mae ei bywyd wedi newid.
Ers pryd ti wedi bod yn gwnïo ac o lle ddaeth y diddordeb?
'Nes i ddechrau gwnïo pan roeddwn yn 10 oed. Roedd 'na glwb gwnïo yn yr ysgol a 'nes i ddisgyn mewn cariad gyda chreu dillad, gynta i fy Sindy Doll, wedyn i fi.
Roedd gen i ddiddordeb mawr mewn dillad a ffasiwn yn ifanc, ond ddim gyda'r pres i brynu'r dillad roeddwn yn hoffi, so mi wnes i weithio allan sut i gopïo dillad o'r magazines fy hun.
Pam wnes di ymgeisio i fynd ar The Great British Sewing Bee?
Es i ar y Sewing Bee i weld os oedd gen i 'rywbeth' - a does 'na ddim beirniaid gwell na Esme Young (tiwtor o'r coleg celf Central Saint Martins) a Patrick Grant (dylunydd dillad sy'n gweithio ar Savile Row). Doeddwn byth yn teimlo mewn cystadleuaeth gyda'r cystadleuwyr eraill, dim ond efo fy hun.
Debra yn barod ar gyfer rownd derfynol The Great British Sewing Bee gyda'i chyd-gystadleuwyr a'r beirniaid: (o'r chwith) Man Yee, Esme Young, Annie, Sara Pascoe (cyflwynydd), Debra, Patrick Grant a Brogan
Roeddwn yn gobeithio cyrraedd hanner ffordd - ond roeddwn yn lwcus i gyrraedd y pen! Dwi'n ddiolchgar iawn am yr holl negeseuon dwi wedi eu derbyn dros y flwyddyn ddiwetha' gan bobl dros Gymru.
Sut beth oedd yr holl brofiad o ffilmio'r gyfres, o orfod treulio amser i ffwrdd o adref, i gadw'r gyfrinach am fisoedd tan i'r rhaglen gael ei darlledu?
Roedd y profiad yn hwyl, heblaw am fod i ffwrdd o fy nheulu mor hir - mae gen i fachgen yn ei arddegau, Albie, a gŵr, Andrew. Roedd y ddau yn prowd iawn fy mod ar y sioe, er dwi yn meddwl fod y ddau yn hapus i gael bwyta lot o gig am y dau fis roeddwn i ffwrdd (dwi'n vegetarian, a mae nhw yn bwyta lot o lysiau fel arfer!).
Roedd cadw'r gyfrinach am fisoedd yn galed hefyd. Dwi ddim yn dda yn cofio celwydd ac roeddwn yn dweud straeon gwahanol wrth bawb!
Yn y gyfres, mae'r cystadleuwyr yn gorfod gwnïo o dan amodau gwahanol iawn i adref, gyda therfyn amser pendant a phob pwyth yn cael ei ffilmio gan gamerâu. Sut beth oedd gweithio o dan yr holl straen?
Roedd 'na lot o baratoi cyn i ni fynd i ffilmio, ond 'nes i fwynhau y darn yma. Ond roedd 'na LOT o stress ar y sioe; lot o bethau'n digwydd o'n cwmpas ni, ac roedd yn bwysig i drio canolbwyntio ar swydd y pryd. Dwi mor falch fydda i byth agen gwnïo o dan pressure fel'na eto!
Ar gyfer y rownd derfynol, roedd y cystadleuwyr yn cael creu dilledyn i rywun roedden nhw'n ei 'nabod, felly cafodd Debra gwmni ei ffrind, Lisa, yn y gweithdy er mwyn gwneud 'jumpsuit' iddi
Mi wnes i orfod cofio fy mod gyda microffôn hefyd; pan oedd pethau'n mynd yn ddrwg, roedd y cameras o gwmpas i ddal y ddrama i'r gynulleidfa gartref.
Felly roedd yn handi iawn cael fy ffrind, Lisa, gyda fi yn y ffeinal oherwydd doedd gan y criw gyda ddim syniad beth oedd yn mynd ymlaen oherwydd ein bod yn siarad Cymraeg! Super-power go iawn!
Beth yw dy hoff ddilledyn wnes di ar y Sewing Bee a pham?
Mae gen i ddau. Y gyntaf ydi'r wisg Miss Havisham i'r sialens gwisg noson Calan Gaeaf i blant. Roeddwn yn stryglo meddwl am rywbeth i blant oherwydd doeddwn erioed wedi gwneud dim byd fel yna o'r blaen.
Ond es i'n ôl i fy mhlentyndod yn Mhenmachno pan roeddwn yn gwylio hen ffilmiau du a gwyn ar b'nawn dydd Sadwrn. Roedd y ffilm Great Expectations yn un o'n ffefrynnau fi; gweld Miss Havisham mewn hen ffrog grand wedi rhwygo a hwn yn codi ofn arna i.
Enillodd Debra wobr Dilledyn yr Wythnos gyda'i gwisg ffansi Calan Gaeaf i blentyn, a'i chanmol yn fawr am ei dilledyn yn y dasg origami
Hefyd, y ffrog origami - wnaeth hon ddim ennill Garment of the Week ond roedd hi y runner-up. Roeddwn i mor hapus gweld y gwyn pur oedd yn cynrychioli Mount Fuji a'r origami yn binc a glas dros y sgert ar fy model. Roedd fatha breuddwyd!
Beth wyt ti wedi bod yn ei wneud ers hynny?
Ers gadael y sioe, dwi wedi agor fy ysgol wnïo fy hun yn Llandudno. Dwi with fy modd dysgu pobl eraill sut i wnïo. Mae gen i ddosbarthiau i dysgwyr ac i bobl sydd gyda mwy o brofiad. Mae 'na gymuned ffantastig yn y stiwdio a dwi wrth fy modd sut mae petha' wedi mynd.
Mae Debra yn rhannu ei champweithiau ar y cyfryngau cymdeithasol
Oes gen ti unrhyw gyngor i gystadleuwyr eleni?
Y cyngor buaswn yn rhoi i'r criw newydd yw: Mwynhewch pob munud - mae'n ffantastig i fod yn ran o sioe fel The Great British Sewing Bee.
A hefyd i beidio darllen gormod ar social media - mae fatha'r Wild West!
Mae cyfres newydd The great British Sewing Bee yn dechrau am 21:00 nos Fercher 24 Mai ar BBC One.
Hefyd o ddiddordeb: