Prosiect yng Nghastell-nedd yn helpu pobl i gael swydd

Mae David Bowden yn dysgu sgiliau adeiladu gyda phrosiect y Fenter Effaith Gymunedol

"Fi 'di dysgu siwd gymaint ar y prosiect yma. Mae wedi agor fy llygaid i gyfleoedd newydd a gobeithio gyrfa newydd."

Tan yn ddiweddar, nid oedd gan David Bowden, 37, o Gastell-nedd yr hyder i ddilyn gyrfa lawn amser ac mae wedi bod allan o waith am sawl mlynedd.

"Roeddwn i eisiau gwneud rhywbeth gwahanol a newydd," dywedodd. "Fe wnes i ychydig o gyrsiau gwahanol yn y coleg ond dim byd roeddwn i wir eisiau ei wneud.

"Fi byth di gwybod beth o'n i eisiau gwneud."

Mae David bellach yn rhan o brosiect sy'n cael ei redeg gan y Menter Effaith Gymunedol.

Mae'r sefydliad yn prynu hen dai sydd mewn cyflwr gwael ac yn rhoi cyfle i bobl sy'n rhan o'r prosiect eu trwsio er mwyn dysgu sgiliau newydd.

Y nod yw helpu pobl i ennill profiad a chymwysterau, a'u dysgu sut i sicrhau bod cartrefi yn arbed ynni ac arian ar filiau yn y pen draw.

Nawr gyda'i sgiliau newydd, mae gyrfa mewn adeiladu yn edrych yn debygol i David.

"Dwi 'di caru'r cwrs yma ers i mi ddechrau. Pan ddechreuais i yn gyntaf doeddwn i ddim yn gwybod llawer am adeiladu, ond rydw i wedi dysgu llawer," meddai.

"Clod i'r bobl sy'n ein dysgu, maen nhw wedi bod yn grêt.

"Nawr rydw i'n edrych am yrfa yn y diwydiant adeiladu. Mae wir wedi agor fy llygaid ac mae gen i obaith am y dyfodol am y tro cyntaf."

Fe wnaeth David gofrestru i fod yn rhan o'r prosiect trwy gynllun 'Ailddechrau' sy'n cael ei redeg gan Adran Gwaith a Phensiynau Llywodraeth y DU. 

Mae'r cynllun yn rhoi cymorth i bobl sydd ar gredyd cynhwysol i ddod o hyd i swyddi yn eu hardal leol.

Ond gall pobl hefyd gyfeirio eu hunain at y prosiect, neu gael eu cyfeirio gan elusen.

Magu hyder a chwrdd â phobl newydd

Cafodd Kieran, 17, o Aberdulais, ei roi mewn cysylltiad â'r prosiect ar ôl iddo orfod gadael y coleg.

"Cefais fy nghicio allan o'r coleg ac felly cefais fy rhoi ar y cwrs yma," dywedodd.

Dywedodd Kieran ei fod yn mwynhau bod yn rhan o'r prosiect gan ei fod yn cael cyfarfod â phobl newydd

"Ar hyn o bryd rydw i'n dysgu am lawer o grefftau ond dwi eisiau gwneud gwaith saer.

"Rydw i wir yn mwynhau yma."

Ychwanegodd: "Mae'n llawer gwell na bod yn y coleg. Rwy'n cael cyfarfod â phobl newydd ac mae'n well i mi nag aros mewn ystafell ddosbarth drwy'r amser.

"Heb y prosiect hwn sai'n siŵr beth bydden i'n gwneud."

Astudiodd Caitlin Struk, 21 oed o Sgiwen, waith saer yn y coleg, ond ar ôl cael ei hanafu ddwywaith, fe benderfynodd roi cynnig ar rywbeth newydd. 

"Fe ddywedodd y ganolfan waith dylai gysylltu â'r prosiect," meddai.

"Yma fi wedi magu hyder drwy gwrdd â phobl newydd," dywedodd Caitlin Struck

"Rwy'n mwynhau bod yn rhan o'r prosiect yn fawr iawn.

"Ar y dechrau o'n i ofn gan fy mod wedi anafu fy hun ddwywaith yn gwneud gwaith saer yn y coleg.

"Ond yma 'dw i wedi dysgu llawer o grefftau gwahanol, a nawr rydw i eisiau mynd i weithio ar 'stafelloedd ymolchi a cheginau achos rydw i wir wedi mwynhau gwneud teils."

Ychwanegodd: "Roeddwn i'n eithaf swil a doedd gen i ddim llawer o hyder mewn gwirionedd, ond yma fi wedi magu hyder drwy gwrdd â phobl newydd."

Dod a phobl at ei gilydd

Unwaith y bydd y tai wedi'u cwblhau, bydd yr elusen yn eu rhoi ar y farchnad ac yn defnyddio'r arian i brynu tŷ gwag arall i'w adfer.

Mae aelodau'r prosiect ar hyn o bryd yn gweithio ar dŷ yng Nghastell-nedd sydd wedi bod yn wag ers 15 mlynedd.

Dywed Trystan Jones, Prif Weithredwr y fenter: "Rwy'n teimlo bod y gwaith rydym yn ei wneud yn hynod bwysig, yn enwedig ers y pandemig, gyda nifer o bobol yn cael trafferth yn ail-gysylltu â'u cymunedau neu gyflogaeth.

Dywedodd Trystan Jones fod prosiect ar y gweill hefyd i addysgu pobl am reoli eu biliau ynni

"Dydyn ni ddim dim ond eisie bobl i ddod yn grefftwyr, ond rydyn ni eisiau rhoi llwyfan iddynt i fynd ymlaen i wneud pethau gwahanol.

"Yn y 10 mlynedd diwethaf, rydyn ni wedi gweld llawer o ganolfannau cymunedol yn cau. Fel clybiau ieuenctid, tafarndai, clybiau pêl-droed ac ati. Yr holl fannau hyn lle mae pobl yn ymgynnull yn ein cymunedau.

"Felly mae'r prosiectau hyn yn cynnig lleoliad i bobl i ddod at ei gilydd i greu'r cysylltiadau cymdeithasol hynny eto, gyda phobl o wahanol oedrannau a chefndiroedd."

Wrth i'r argyfwng costau byw barhau, mae'r elusen hefyd am ganolbwyntio ar ddysgu pobl am gynaliadwyedd a sut i leihau biliau'r cartref.

"Mae ganddon ni brosiect tair blynedd ar y gweill i helpu pobl i ddeall sut i leihau eu biliau ynni," meddai Mr Jones.

"Da ni ddim eisiau canolbwyntio ar y pethau sgleiniog yn unig fel cael boeler newydd, ond hefyd y camau bach o ddydd i ddydd sy'n effeithio ar faint o ynni rydyn ni'n ei ddefnyddio."