Dartio 100,000 pwynt yn Llanuwchllyn i gefnogi claf canser

O'r chwith: Cai, Cadi, Idris, Huw ac Osian wedi'r sialens

Bu taflwyr dartiau Llanuwchllyn yn hynod o brysur ddydd Sadwrn a hynny er mwyn cefnogi claf sydd wedi cael diagnosis o ganser yn ddiweddar.

Nod y ddau griw, Eagles A ac Eagles B, oedd un ai cyrraedd y targed uchelgeisiol o gael 100,000 pwynt neu chwarae am 12 awr gyfan yn nhafarn yr Eryrod - gan ddechrau am 12:00.

Cai Guest Rowlands oedd trefnydd y digwyddiad a hynny er mwyn codi pres at elusen Macmillan, fel modd o ddangos cefnogaeth i ddyweddi ei chwaer - Huw Jones - a gafodd ddiagnosis o ganser y llynedd.

Dywedodd Huw, sy'n 33 oed ac yn wreiddiol o Gorwen, fod o'n "rili neis fo' nhw 'di mynd allan o'u ffordd i hel pres" yn ei enw.

Dyma'r criw fu'n chwrarae'r dartiau

Cafodd Huw wybod fod ganddo cholangiocarcinoma fis Medi'r llynedd - math o ganser prin sy'n dechrau yn nwythellau'r bustl [bile ducts] ac sy'n effeithio ar yr iau.

Mae'r canser "hefo canran uchel i ddod 'nôl - tua 47%," meddai Huw ac mae wedi lledaenu i'w ysgyfaint ac ymhellach.

"O'n i'n nofio yn Llyn Tegid ben bore llynedd, yn trainio ar gyfer triathlon, a dyna pryd 'nes i ddechrau teimlo wbeth yn brifo yn y torso," meddai Huw.

Fe wnaeth ganfod lwmp wedi hynny - gan feddwl mai torgest [hernia] oedd yno i ddechrau ac felly aeth i weld meddyg.

Esboniodd y byddai cael diagnosis wedi gallu bod yn broses hir iawn, felly aeth yn breifat, cael sgan MRI a chael canlyniad ymhen ychydig wythnosau.

"O'n i'n gwybod fod o ddim am fod yn ganlyniad da," meddai Huw, gan ddweud fod ymateb y meddygon wedi awgrymu hynny.

"O'dd y canser wedi spreadio'n barod ac oedd hynny'n dipyn o ergyd, achos o'dd Cadi yn disgwyl babi adeg hynny - rhyw 16/17 wythnos i mewn."

Cai (dde) gyda Huw, Cadi ac Idris

Rhyw fis yn ddiweddarach cafodd Huw wybod fod y canser wedi gwasgaru i bob man yn ei stumog.

"Natho' nhw ofyn os o'n i isho'i adael o a g'neud dim byd, ond oedd Cadi yn disgwyl ers tua 20 wythnos," meddai.

Gan ei fod eisoes hefo colitis [llid y colon], roedd hynny hefyd yn cyfyngu'r triniaethau oedd ar gael iddo.

"Cemo oedd yr unig opsiwn" - a dyna wnaeth Huw am gyfnod, gan fyw gyda sgil effeithiau trwm y driniaeth.

Ond doedd un tiwmor yn ei fol ddim yn ymateb i'r cemotherapi, gan achosi i'w ystumog chwyddo a chau'r bibell.

"D'on i methu b'yta, yfed na dim byd. Ges i emergency stent lawr 'ngwddw, i gadw o ar agor.

"Dwi 'di cael lot o bethe'n mynd yn wrong - gorfod cael steroids at colitis fi, dwi 'di cael sepsis fwy nag unwaith a methu cadw bwyd a diod i lawr."

Y criw yn cyrraedd 10,000 ddydd Sadwrn

Ar ôl hynny daethant, fel teulu, o hyd i driniaeth arbrofol newydd o America.

Bu'n rhaid i Huw aros am fis cyn mynd ar y treial, oherwydd "problemau hefo'r deliveries" - gan achosi i'r canser "chwyddo a'r poen i fynd yn waeth".

"Ond, unwaith 'nes i gychwyn ar y drug newydd 'ma, oedd y gwahaniaeth yn instant – gallu g'neud mwy o bethau fel beicio, gwaith rhan amser a 'neud pethe hefo teulu, sy'n neis."

Dywedodd hefyd fod maint y canser wedi mynd yn llai yn sgil y driniaeth newydd, "o wyth centimetr i tua pedwar centimetr".

"Dwi'n goro mynd i Lundain i gael triniaeth pob pythefnos a scans bob tri mis, achos fod y drug ddim yn fully approved ar y funud - dim ond trials."

Mi feiciodd Huw 56 milltir yn ddiweddar, gyda'i nyrs a'i dad

Ddyddiau cyn diwrnod y dartiau, esboniodd Cai Rowlands strwythur y marathon.

"De' ni'n anelu am 100,000 o bwyntie, neu gario 'mlaen i chware darts am 12 awr ynde - os na fydd y targed yn bosib.

"Ma'n siŵr y bydden ni'n cymryd troeon wrth y bwrdd darts a rhannu i fyny," meddai.

Aeth Cadi ac Idris, eu mab, i gefnogi Huw ar y daith feicio ddechrau Medi

"Ma'r syniad 'ma - o her 100,000 yn r'wbeth ma' Macmillan yn gynnig i bobl neud, er mwyn codi pres," meddai Cai.

Dywedodd Cadi Guest Rowlands, cariad Huw, ei fod yn deimlad braf fod Cai, ei brawd hŷn, wedi trefnu'r diwrnod a bod Osian, ei hefaill, hefyd yn mynd i fod yn rhan o'r marathon dartiau.

Ychwanegodd Cadi fod cynnal y digwyddiad "yn lleol, lle ma' pawb yn 'nabod ni, yn reit neis".

Huw a'i dad

Yn ddiweddar bu Huw ei hun yn gwneud her i godi pres, sef beicio 56 milltir gyda'i dad ac un o'r nyrsys o Lundain sy'n rhoi cymorth iddo.

Fe lwyddon nhw i godi dros £6,000 i ddau achos - elusen AMMF [The Cholangiocarcinoma Charity] a'r ysbyty yn Llundain lle mae Huw wedi bod yn derbyn triniaeth.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.