Lowri Mair Jones yn ennill Tlws y Cerddor yr Eisteddfod

Lowri Mair Jones sydd wedi ennill Tlws y Cerddor Eisteddfod Genedlaethol Llŷn ac Eifionydd.

Y dasg eleni oedd cyfansoddi darn wedi'i ysbrydoli gan alaw / alawon gwerin Cymreig, a gymer hyd at wyth munud i'w berfformio gan offeryn unawdol a chyfeiliant gan rhwng un a phedwar offeryn.

Bydd Lowri yn ennill Tlws y Cerddor, yn rhoddedig gan Gymdeithas Cerddoriaeth Cymru, a £750 o rodd er cof am Tecwyn Ellis gan Valerie Ellis, Bangor a'r teulu.

Pwy ydy Lowri Mair Jones?

Ganed Lowri ym Mhontypridd, a chafodd ei gwersi offerynnol cyntaf pan oedd hi yn Ysgol Gynradd Pont Siôn Norton. Bu'n ffodus iawn i ddysgu'r piano, ffidil a thelyn.

Tra roedd hi yn Ysgol Gyfun Rhydfelen daeth i ddechrau cyfansoddi am y tro cyntaf, a ffeindiodd ei hangerdd am gerddoriaeth glasurol yng ngherddorfa'r Pedair Sir, ac yn ddiweddarach, Cerddorfa Genedlaethol Ieuenctid Cymru.

Aeth i Brifysgol Manceinion i astudio gradd mewn cerddoriaeth, ac arhosodd yno i wneud cwrs Meistr mewn cyfansoddi.

Ar ôl graddio, gweithiodd fel telynores broffesiynol yn ardal Manceinion, a chwaraeodd gyda nifer o gerddorfeydd a grwpiau proffesiynol, yn ogystal â phriodasau a digwyddiadau.

Pwyll ap Siôn, Guto Pryderi Puw ac Angharad Jenkins oedd y beirniaid

Symudodd yn ôl i Gymru i weithio yng Nghanolfan Mileniwm Cymru, cyn gweithio yng Ngholeg Brenhinol Cerdd a Drama Cymru, Caerdydd.

Yn 2008 symudodd i weithio i'r diwydiant teledu, ac ar ôl peth amser yn gweithio i gwmni teledu annibynnol, ymunodd â'r BBC yn 2011.

Lowri oedd yn cydlynu cystadlaethau 'BBC Young Musician' a'r 'BBC Young Dancer'.

Mae wedi gweithio ar amryw o gynyrchiadau eraill i'r BBC, fel Canwr y Byd, Proms in the Park, yr Eisteddfod Genedlaethol a Glastonbury, ac ar hyn o bryd mae'n rheolwr cynhyrchu yn Adran Addysg BBC Cymru.

Y feirniadaeth

Y beirniaid eleni oedd Pwyll ap Siôn, Angharad Jenkins a Guto Pryderi Puw.

Wrth draddodi ar ran ei gyd-feirniaid, dywedodd Pwyll ap Siôn: "Roeddem fel beirniad yn chwilio yn bennaf am ddau beth.

"Yn gyntaf, darn oedd yn arddangos gwreiddioldeb o ran sain, arddull, a synwyrusrwydd cerddorol, gan ddangos awydd i ddefnyddio'r alaw neu alawon fel sail yn unig - sbardun ar gyfer darn o gerddoriaeth cwbl newydd a gwreiddiol yn hytrach na threfniant syml.

"Ac yn ail, fod y darn buddugol yn adlewyrchu'r cyfnod rydan ni'n byw ynddi heddiw - darn cyfoes na allai fod wedi cael ei ysgrifennu gan gyfansoddwr hanner canrif neu hyd yn oed chwarter canrif yn ôl.

"Allan o'r 10 ymgais a ddaeth i law, roedd nifer yn ticio'r bocs cyntaf (h.y., 'gwreiddioldeb'), ond llai at ei gilydd yn llwyddo i greu darn oedd yn adlewyrchu sain y presennol.

"Yn wir, roedd 'na gryn amrywiaeth rhwng cyfansoddiadau oedd yn fwy 'clasurol' ei naws a rhai mwy cyfoes, gyda dylanwad genres gwerin/cyfoes, jazz diweddar, cerddoriaeth ffilm, ambient, a chyffyrddiadau minimalaidd i'w clywed yn y cyfansoddiadau mwyaf gwreiddiol.

Pwyll ap Siôn fu'n traddodi'r feirniadaeth ar ran ei gyd-feirniaid

"Dyma ddod at y cystadleuydd olaf, sef 'Lisa Lân' gan Mr Myiagi ar gyfer cello unawdol i gyfeiliant ffidil a phiano. Dyma ddarn sy'n hoelio'r sylw o'r dechrau. Clywir harmonïau o'r byd jazz yng nghordiau agoriadol y piano.

"Nid sain jazz traddodiadol, fodd bynnag, ond un mwy cyfoes, yn awgrymu dylanwad ffigyrau megis Herbie Hancock, Keith Jarrett a Gwilym Simcock.

"Dyma gyfansoddwr sydd â chlust harmonig dda ond eto sy'n hapus i aros yn yr un lle cyn belled a bod y gerddoriaeth yn caniatáu hynny.

"Rhoddir awgrym o'r gân werin 'Lisa Lân' ar y dechrau, cyn ei dyfynnu'n llawn yn yr adran ganol yn rhan y cello.

"Ceir defnydd diddorol o gyfeiliant yn rhan y ffidil - offeryn sydd fel arfer yn cymryd y brif alaw - ond yma mae'n cael ei defnyddio i greu patrymau ostinato effeithiol, gwrthgyferbyniol.

"Mae 'na sain trawiadol, unigryw yn perthyn i gyfansoddiad Mr Myiagi, ac ar ôl clywed nifer o geisiadau yn mynd ati i ddefnyddio nifer fawr o alawon, braf clywed trefniant sy'n canolbwyntio ar un yn unig.

"Mae ymdriniaeth Mr Myiagi o 'Lisa Lân' wedi ei wreiddio yn y cyfnod da ni'n byw ynddo yn hytrach nag mewn arddull oedd yn berthnasol flynyddoedd yn ôl - dyma'r math o gerddoriaeth fyddai'n gweddu ar gyfer ar gyfer raglenni radio Georgia Ruth a'r cerddor jazz amryddawn Tomos Williams, gyda chyffyrddiadau genres cyfoes megis ambient, lounge, a chilled out wedi eu plethu gyda sain jazz minimalaidd.

"...Ar ôl cryn drafod a phwyso a mesur cytunwyd yn unfrydol mai'r enillydd am eleni fydd Mr Myiagi."