Cerbydau'n cael eu dal gan y llanw ar draethau Gwynedd

Roedd fan wedi mynd yn sownd yn y tywod ar draeth Morfa Bychan cyn cael ei dynnu o'r dŵr fore Sul

Mae 'na rybudd gan wylwyr y glannau i bobl beidio â pharcio eu cerbydau ar draethau yng Ngwynedd wedi i ddau gael eu dal gan y llanw dros nos.

Yn ôl swyddogion roedd fan wedi mynd yn sownd yn y tywod ar draeth Morfa Bychan, Porthmadog, ac roedd cerbyd arall yn Abersoch wedi diflannu'n llwyr yn ystod cyfnod o lanw uchel.

Dywedodd llefarydd ar ran Gwylwyr y Glannau Caergybi fod ceir ar y traeth yn broblem barhaus ym Morfa Bychan.

"Gall pobl yrru'n syth i'r traeth yno," meddai.

"Mae'n ardal boblogaidd gyda cheir yn mynd i lawr yno, yn enwedig gyda gyrwyr iau yn drifftio o gwmpas, sy'n broblem arall.

"Naw gwaith allan o ddeg dydy o ddim yn broblem a dydyn nhw ddim yn mynd yn sownd, ond mae'n gallu digwydd."

Mae achosion tebyg yn "gyffredin" ym Morfa Bychan, medd Gwylwyr y Glannau

Dywedodd y llefarydd fod y digwyddiad yn Abersoch yn fwy anarferol.

"Mae'r Land Rover ar Draeth Machroes. Daeth yr alwad i mewn yn oriau mân y bore 'ma, felly mae'n rhaid ei fod wedi mynd yn sownd dros nos.

"Mae tua metr o dan y penllanw. Bydd yn dod yn broblem mordwyo a bydd Abersoch yn rhoi rhybudd mordwyo lleol allan.

"Fydd y llanw isel ddim tan 17:20.

"Hyd yn hyn does dim perchennog wedi dod ymlaen. Mae'n debyg y bydd rhaid mynd at y cyngor i'w adennill oni bai bod y perchnogion yn dod ymlaen."

Mewn datganiad pellach brynhawn Sul fe ddywedodd Gwylwyr y Glannau Caergybi eu bod "yn aros am dractor i'w dynnu oddi ar y traeth rŵan bod y llanw wedi mynd allan".

Fe gyfeiriodd y llefarydd at achos arall "ychydig flynyddoedd yn ôl" pan roedd "Mercedes o dan ddŵr ym Mae Treaddur ac yn y diwedd roedd yn rhaid i ddeifwyr fynd ato".

Dyw achosion o'r fath ddim yn digwydd "gymaint erbyn hyn ond mae'n gyffredin ym Morfa Bychan".