Llanelli: Gwrthod cais i adleoli canolfan ddibyniaeth

Roedd cais i sefydlu canolfan llesiant mewn hen swyddfeydd ger doc Llanelli

Mae cynllun dadleuol i adleoli gwasanaeth i drin dibyniaeth ar alcohol a chyffuriau yn Llanelli wedi cael ei wrthod gan bwyllgor cynllunio Cyngor Sir Caerfyrddin.

Roedd Bwrdd Iechyd Hywel Dda wedi cyflwyno cais i sefydlu 'Canolfan Llesiant' yn swyddfeydd Dragon 24, a fyddai'n cynnwys symud Gwasanaeth Alcohol a Chyffuriau Dyfed (DDAS) o Stryd Vaughan yng nghanol y dref.

Roedd gwrthwynebiad wedi bod gydag un cynghorydd yn ei ddisgrifio fel "cynllun peryglus" oherwydd bod yr adeilad yn agos i'r doc ac Afon Lliedi.

Cafodd y cynllun ei wrthod gan y pwyllgor cynllunio o naw pleidlais i bedair.

Dywedodd y swyddog cynllunio, John Thomas, ei fod yn debygol y bydd y bwrdd iechyd yn apelio'r penderfyniad.

'Pryderon iechyd a diogelwch'

Roedd dros 200 o bobl wedi cyflwyno eu gwrthwynebiad i'r cais ar-lein, ac ar 11 Medi gwnaeth tua 70 o bobl gynnal protest dawel tu allan i'r ganolfan arfaethedig, dan arweiniad dau gynghorydd sir leol.

"Mae 'da ni bryderon mawr am iechyd a diogelwch," dywedodd y Cynghorydd Sean Rees ar y pryd.

"Mae yna alw am y gwasanaeth ond mae'r lleoliad yn allweddol. Dyma'r lleoliad gwaetha' posib."

Bu protest yn erbyn lleoliad y ganolfan llesiant newydd yn Llanelli

Dywedodd y Cynghorydd Louvain Roberts: "Ry'n ni yn deall bod angen gwasanaeth ond mae pobl leol yn bryderus. Fe fydd hyn yn symud y broblem o un ardal i un arall.

"Mae yna ddŵr yn agos iawn at y safle, ar y ddwy ochr. Mi allai hynny fod yn beryglus.

"Mae dŵr yn y doc ac yn yr afon [Lliedi]. Mi allen nhw syrthio i'r dŵr."

Mae'r Gwasanaeth Alcohol a Chyffuriau Dyfed yn rhoi "gofal adferol" i bobl er mwyn "lleihau dibyniaeth" ar alcohol a chyffuriau ynghyd â chynnig cymorth i'w ffrindiau a theuluoedd.

Yn ôl y bwrdd iechyd fe fyddai'r ganolfan newydd yn "newid bywydau" yn Llanelli.