Cyhuddo dyn o geisio llofruddio dynes feichiog yn Aberfan
- Cyhoeddwyd
Swyddogion heddlu yn ymateb i'r digwyddiad yn Heol Moy, Aberfan ddydd Mawrth
Mae dyn 28 oed wedi cael ei gyhuddo o geisio llofruddio menyw feichiog yn dilyn digwyddiad yn Aberfan.
Roedd heddlu arfog yn rhan o'r ymateb yn dilyn y digwyddiad ar Heol Moy ychydig ar ôl 09:00 ddydd Mawrth.
Fe fydd Daniel Mihai Popescu, o Ferthyr Tudful, yn mynd o flaen llys ynadon y dref fore Iau.
Mae hefyd wedi'i gyhuddo o stelcian a chodi ofn ar dyst.
Dywed Heddlu De Cymru bod y fenyw 29 oed a gafodd anaf ar ôl cael ei thrywanu wedi gadael yr ysbyty erbyn hyn.
Roedd tystion wedi dweud wrth y BBC bod y fenyw yn feichiog.