Rygbi: Canlyniadau'r pedwar rhanbarth Cymreig

Matthis Lebel sgoriodd y gyntaf o saith cais Toulouse

Toulouse 52-7 Caerdydd

Cafodd Caerdydd grasfa gan Toulouse yng Nghwpan Pencampwyr Investec.

Marciodd Blair Kinghorn ei ymddangosiad gyntaf dros Toulouse trwy groesi ddwywaith wrth i bencampwyr Ffrainc hawlio buddugoliaeth o saith cais yn Stade Ernest Wallon.

Hawliodd wythwr tîm dan 20 Cymru, Mackenzie Martin, ei gais cyntaf mewn ymdrech ddewr.

Ond roedd tîm ifanc Caerdydd yn brwydro i ddal i fyny â grym a thalent y tîm cartref.

Sicrhaodd Matthis Lebel, Richie Arnold, Kinghorn ac Anthony Jelonch bwynt bonws erbyn hanner amser cyn i Arthur Retiere, Alban Placines a Kinghorn goroni'r berfformiad ac ychwanegu at y sgorfwrdd.

Castres Olympique 34-16 Scarlets

Dechreuodd y Scarlets eu hymgyrch Cwpan Her Ewrop gyda cholled yn erbyn Castres.

Dangosodd y tîm o Ffrainc eu safon gan fanteisio ar ddisgyblaeth wael wrth i'r Scarlets fynd lawr i 14 dyn ddwywaith yn yr hanner cyntaf.

Sgoriwyd ceisiau gay Josaia Raisuqe, Jeremy Fernandez, Abraham Papalii, Julien Dumora a Louis Le Brun mewn amgylchiadau anodd.

Ymatebodd Ioan Lloyd gyda 16 pwynt i'r Scarlets, gan gynnwys eu hunig gais.

Gweilch 43-34 Benetton

Dewi Lake oedd y seren wrth i'r Gweilch agor eu hymgyrch Cwpan Her gyda buddugoliaeth dros Benetton.

Croesodd y bachwr bedair gwaith wrth i fomentwm symud yn ôl ac ymlaen mewn gêm gyffrous o 10 cais yn Abertawe.

Roedd Lake yn un o lond dwrn o chwaraewyr rhyngwladol Cymru a oedd yn dychwelyd wrth i'r Gweilch ddial am golled yn y gynghrair y penwythnos diwethaf.

Sgoriodd Onisi Ratave ddwywaith i'r ymwelwyr, ond noson y Gweilch oedd hi yn y pen draw.

Dreigiau 24-7 Oyonnax

Brwydrodd y Dreigiau yn ol gyda thri chais yn y pum munud olaf i hawlio buddugoliaeth annisgwyl a phwyntiau bonws yng Nghwpan Her Ewrop.

Rhoddodd Leo Treilles yr ymwelwyr o Ffrainc ar y blaen o 7-0 ar hanner amser yn Rodney Parade.

Daeth Ashton Hewitt yn brif sgoriwr ceisiau Ewropeaidd y Dreigiau erioed gyda'i 14eg i lefelu'r sgôr.

Sgoriodd Rio Dyer ddwywaith wedi cais y clo Joe Davies, wrth i ddiweddglo hynod setlo'r gêm er mai 7-7 oedd y sgôr o hyd wedi 74 munud.

Y Dreigiau oedd yn dathlu, serch hynny, wrth sicrhau ond eu ail buddugoliaeth o'r tymor.