Atal trwydded tafarn yn Nhywyn, Sir Conwy ar ôl i blant feddwi
- Cyhoeddwyd
Mae trwydded tafarn a chlwb nos yn Sir Conwy wedi ei hatal am dri mis, ar ôl i blant mor ifanc ag 13 oed gael eu canfod wedi meddwi ac yn anymwybodol ar y palmant y tu allan i'r adeilad.
Galwodd Heddlu'r Gogledd am adolygiad o statws Sonny's Bar a chlwb nos Bentley's yn Nhywyn yn dilyn y digwyddiad.
Cafodd cyfarfod o is-bwyllgor trwyddedu Cyngor Conwy ei gynnal ar 8 Rhagyr i ystyried adroddiad oedd yn cyfeirio at 16 trosedd ac achos o anhrefn yn ymwneud â'r lleoliad ers mis Ebrill.
Yn ystod y gwrandawiad, ymddiheurodd Emma Priestley, perchennog EJP Entertainment - sy'n rheoli'r dafarn a'r clwb - i'r is-bwyllgor, gan ddweud mai un o uwch-aelodau ei staff, sydd ddim yn gweithio yno bellach, oedd yn gyfrifol.
Dywedodd yr is-bwyllgor hefyd fod goruchwyliwr y safle wedi ei symud o'i swydd, a bod "amodau cynhwysfawr" wedi eu hychwanegu er mwyn atal plant rhag niwed.
Mae modd i'r perchennog apelio yn erbyn y penderfyniad.
Mae EJP Entertainment wedi cael cais am sylw.