Penrhyndeudraeth: Arestio dyn ar amheuaeth o lofruddio
- Cyhoeddwyd
Roedd presenoldeb yr heddlu yn dal yn amlwg yn yr ardal ddydd Iau
Mae dyn 46 oed wedi cael ei arestio ar amheuaeth o lofruddiaeth yn dilyn marwolaeth dynes ym Mhenrhyndeudraeth.
Dywedodd Heddlu'r Gogledd eu bod wedi cael eu galw gan y gwasanaeth ambiwlans i eiddo yn y dref toc cyn 12:00 ddydd Mercher.
Ychwanegodd y llu eu bod wedi canfod corff dynes yno.
Dywedon nhw fod dyn 46 oed wedi cael ei arestio ar amheuaeth o lofruddiaeth, ac mae ymchwiliad y llu yn parhau.
Ychwanegodd yr heddlu eu bod yn ei drin fel "digwyddiad unigol", ac nad oes rheswm i'r gymuned ehangach boeni.