Carcharu dyn o Wynedd gymrodd allweddi i dreisio menyw fregus
- Cyhoeddwyd
Mae Gareth Dilwyn Druce wedi cael ei garcharu am dreisio un ddynes ac ymosod yn rhywiol ar ddynes arall
Mae dyn o Wynedd wedi cael dedfryd o garchar am dreisio dynes fregus ar ôl ei helpu i gyrraedd adref ar ôl noson allan.
Fe wnaeth lluniau CCTV ddangos bod Gareth Dilwyn Druce, 33 o Flaenau Ffestiniog, wedi bod yn gwylio a dilyn merched oedd ar eu pen eu hunain yn yr oriau cyn yr ymosodiad ym Mae Colwyn yn 2022.
Wedi i reithgor yn Llys y Goron Caernarfon ei gael yn euog o dreisio, cafodd ddedfryd o 12 mlynedd o garchar, gyda chyfnod estynedig o bedair blynedd ar drwydded fel troseddwr peryglus.
Fe gafodd ddedfryd arall o wyth mis o garchar hefyd, ar ôl pledio'n euog i gyhuddiad o ymosod yn rhywiol ar ddynes arall yn 2021 - deufis cyn yr achos o dreisio.
Bydd ei enw'n cael ei roi ar y Gofrestr Troseddau Rhyw, ac mae wedi derbyn Gorchymyn Atal Niwed Rhywiol.
Cymryd goriadau
Clywodd yr achos, a barodd am saith diwrnod, bod y dioddefwr wedi bod yn yfed, ac wedi cael ei tharo'n wael ac yn cael trafferth cerdded.
Roedd dyn arall yr oedd y ddynes wedi ei gyfarfod yn gynharach y noson honno yn ei helpu i gerdded adref.
Clywodd y llys bod Druce wedi gweld y ddau a manteisio ar y sefyllfa, gan gynnig i helpu hefyd. Wrth iddyn nhw fynd i'w heiddo, fe roddodd ei goriadau yn ei boced.
Mae lluniau CCTV ger yr adeilad yn dangos y ddau ddyn yn gadael gyda'i gilydd funudau ar ôl cyrraedd gyda'r ddynes - a'r diffynnydd yn dychwelyd maes o law ar ei ben ei hun.
Cafodd Gareth Dilwyn Druce ei weld yn gwylio a dilyn merched oedd ar eu pen eu hunain ym Mae Colwyn
Doedd Druce ddim yn ei 'nabod, na'r ddynes arall yr oedd eisoes wedi ymosod arni.
"Does dim modd awgrymu y byddai'r dioddefwr wedi bod mewn unrhyw gyflwr i ganiatáu gweithred rywiol," meddai Ceri Ellis-Jones o Wasanaeth Erlyn y Goron.
"Fe dargedodd y diffynnydd yn fwriadol - ddioddefwr oedd yn fregus - a thrwy gymryd arno ei fod yn ei helpu, fe lwyddodd i fynd i'w chartref."
Gan groesawu'r dyfarniadau a'r dedfrydau, dywedodd y Ditectif Gwnstabl Marc Jones bod y ddwy ddynes "wedi amlygu gwytnwch a nerth trwy'r broses ac rwy'n gobeithio yn dilyn dedfrydau heddiw y byddan nhw'n gallu symud ymlaen yn eu bywydau".