Cwpan Heineken

Yr Albanwr Dan Parks gafodd 20 o bwyntiau'r Gleision yn erbyn Caeredin

Gleision 25-8 Caeredin

Roedd gwaith cicio'r Albanwr Dan Parks yn allweddol i fuddugoliaeth Gleision Caerdydd yn erbyn Caeredin yng nghystadleuaeth Cwpan Heineken nos Wener.

Cafodd Parks 20 o'r 25 pwynt y tîm cartref wrth iddyn nhw symud uwchben eu gwrthwynebwyr i frig tabl Grŵp 2.

Dyma chweched fuddugoliaeth Y Gleision yn erbyn y tîm o'r Alban o'r bron.

Alex Cuthbert gafodd unig gais y tîm cartref yn hwyr yn y gêm.

Roedd y sgôr llawer agosach ar yr hanner, 6-3 i'r Gleision.

Daeth unig gais Caeredin i Lee Jones ond chafodd y cais ddim ei drosi.

Roedd Greig Laidlaw wedi llwyddo gyda chic gosb yn yr hanner cyntaf - unig bwyntiau'r ymwelwyr yn y 40 munud cyntaf.

Ond doedd hynny ddim yn ddigon yn erbyn tîm cryf Y Gleision.

Fe fydd Y Gleision yn teithio i Gaeredin ar gyfer yr ail gêm nos Wener nesaf.

Scarlets 14-17 Munster

Munster sy'n rheoli Grŵp 1 wedi eu 13eg buddugoliaeth yn olynol yn erbyn y Scarlets ym mhob cystadleuaeth.

Canolwr Munster, Lifeimi Mafi, yn bylchu yn erbyn y Scarlets

Roedd ergyd i'r Scarlets cyn dechrau. Oherwydd anaf i'w goes, doedd George North ddim i chwarae.

Ond am gyfnod doedd dim ei angen e chwaith. Roedd cais cynnar Aaron Shingler yn ddim llai na haeddiannol.

Ac wedi methu ddwywaith yn barod at y pyst, llwyddodd Rhys Priestland gyda'i drydydd cynnig. Dyna'r tro ola' y byddai'r Scarlets ar y blaen.

Tarodd Munster 'nôl gyda Ronan O'Gara'n dechrau'r gwrthymosodiad arweiniodd at gais cynta'r ymwelwyr yn fuan wedi llwyddo'i hun â gôl gosb.

Nial Ronan diriodd, a chyda thriphwynt arall cyn troi, roedd gan y Gwyddelod fantais o driphwynt.

Yn ôl y disgwyl mi barhaodd hi'n ornest dynn tan y diwedd wrth i'r ddau faswr gyfnewid dwy gôl gosb arall yr un.

Mae colli'n golygu y bydd pwysau aruthrol ar y Scarlets mas ym Munster y penwythnos nesa'.

Saracens 31-26 Gweilch

Y Saracens gipiodd y fuddugoliaeth mewn gêm gyffrous yn Wembley ond mae pwynt bonws y Gweilch yn eu cadw yn y ras i gyrraedd y rownd nesaf.

Asgellwr y Saracens, David Strettle, yn ceisio osgoi maswr y Gweilch Dan Biggar

Roedd y tîm cartref 10-3 ar y blaen ar ôl cais cynnar Rhys Gill cyn i'r cyntaf o ddau gais Ashley Beck ddod â'r ymwelwyr yn gyfartal.

Ond y Saracens oedd yn arwain 23-13 ar yr egwyl ar ôl cais gan Ernst Joubert a thair cic gosb gan Owen Farrell.

Ymestynnwyd y fantais i 28-16 gan gais Chris Wyles, cyn i Beck gael ei ail gais a phedwaredd gic gosb Dan Biggar.

Bydd y ddau dîm yn cwrdd eto yn Stadiwm Liberty ddydd Gwener gyda gobeithion y ddau dîm yn dal yn fyw, yn enwedig yn dilyn buddugoliaeth Treviso yn erbyn Biarritz ddydd Sadwrn.