Ymgyrchwyr i gadw catrawd yn mynd i San Steffan

Roedd y gatrawd yn rhan o ddathliadau Jiwbilî Diemwnt y Frenhines yng Nghaerdydd ddechrau mis Mehefin

Mae ymgyrchwyr sy'n brwydro i achub catrawd y Queen's Dragoon Guards yn cynnal rali yn Llundain.

Fe fydd cyn-filwyr, gan gynnwys un gŵr 93 oed oedd yn gwasanaethu yng Ngogledd Affrica - Harold Ponfield - yn cyfarfod yn San Steffan cyn cyflwyno deiseb i Downing Street.

Mae 'na bryder y bydd y gatrawd yn dod i ben o dan gynlluniau gan Lywodraeth San Steffan i wneud toriadau i'r adran amddiffyn.

Dywedodd economegydd ar amddiffyn bod teyrngarwch i gatrawd yn hirhoedlog ac yn cael eu cadw gan nifer.

Ond dywedodd na fyddai rhai unedau hanesyddol yn diflannu.

Mae gan y llywodraeth gynlluniau i gwtogi nifer yr aelodau sydd yn y fyddin o 102,000 i 82,000 erbyn 2020.

Dim penderfyniad

Ym mis Mai fe ddywedodd cyn swyddogion a ffynonellau uchel yn y gatrawd y gallai'r enw ddiflannu'n llwyr.

Mae'r gatrawd yn un o dair Cymreig sy'n dal i fodoli.

Ond mae'r Adran Amddiffyn yn dweud nad oes 'na benderfyniad wedi ei wneud eto.

Yn gynharach yn y mis fe wnaeth y gatrawd orymdeithio drwy Abertawe a Chaerdydd i nodi eu bod adref wedi taith chwe mis i Afghanistan.

Cafodd gwasanaeth coffa ei gynnal yn Eglwys Gadeiriol Llandaf er cof am y rhai a fu farw yn ystod y daith.

Gobaith ymgyrch savethewelshcavarly.com yn Llundain ddydd Iau yw dylanwadu ar y penderfyniad y bydd rhaid i'r ysgrifennydd amddiffyn ei wneud yn y toriadau nesaf.

Fe fydd yr ymgyrchwyr yn gyrru tanc drwy'r strydoedd er mwyn codi sylw.

"Rydym am iddyn nhw ein cymryd o ddifri ac i fod wedi eu cynrychioli yn iawn o fewn yr Undeb," meddai llefarydd.

"Pan oedd y gatrawd yng Nghymru'r wythnos diwethaf, roedd 'na groeso arbennig iddyn nhw.

"Ein cam nesaf yw mynd a'r gefnogaeth i San Steffan."