Derbyn cynlluniau i droi Castell Gwrych yn westy pum seren
- Cyhoeddwyd
Mae Ymddiriedolaeth Cadwraeth Castell Gwrych yn croesawu’r cynlluniau
Mae Cyngor Sir Conwy wedi caniatáu cynlluniau i droi Castell Gwrych ger Abergele yn westy moethus.
Ar ôl astudio manylion y prosiect, cyhoeddodd cynghorwyr Conwy ddydd Mercher eu bod yn hapus i gynnig caniatâd amodol i'r cynlluniau ailddatblygu.
Mae'r adeilad Gothig Gradd I, a gafodd ei adeiladu yn 1819, heb do erbyn hyn.
Mae'r prosiect i'w droi yn westy pum seren yn cynnwys cynlluniau ar gyfer 75 ystafell wely, sba a chyfleusterau golff.
Cynigwyd y cynlluniau gan gwmni Castell Developments o ogledd orllewin Lloegr, sydd â swyddfeydd yn Llanelwy.
Dywedodd Mark Baker, cadeirydd Ymddiriedolaeth Cadwraeth Castell Gwrych a gafodd ei ffurfio yn y 1990au i achub yr adeilad, bod hyn yn newyddion gwych.
"Mae o wir yn gyffrous bod dyfodol y castell yn edrych yn fwy addawol.
"Dwi'n gobeithio bydd popeth yn dod at ei gilydd er mwyn i'r cyhoedd cael ei fwynhau fel un o brif atyniadau twristaidd gogledd Cymru unwaith eto."
Eglurodd Mr Baker bod sawl person enwog wedi aros yn y castell dros y blynyddoedd.
Roedd yna sw i blant yn y gerddi ac roedd yr ystafelloedd ar agor i'r cyhoedd.