Maniffesto i roi 'sbardun' i Gymru

Mae Carwyn Jones yn gobeithio ennill tymor arall fel Prif Weinidog.

Mae Llafur Cymru wedi lansio eu maniffesto ar gyfer etholiad y Cynulliad ddydd Mawrth, gyda "chynllun ar gyfer llewyrch" fydd, meddai'r blaid, yn rhoi sbardun i Gymru.

Mae'r cynllun yn cynnwys "banc datblygu" i gefnogi busnesau bychain ac addewid i ddod a band llydan cyflym i bawb.

Dywedodd arweinydd Llafur Cymru, Carwyn Jones, mai ei fwriad oedd creu mwy o swyddi a swyddi gwell.

Daw'r ffocws ar yr economi ar ôl iddo ysgrifennu ym mhapur y Sunday Telegraph fod yna fwy y gallai ei wneud "er mwyn rhoi trefn ar y modd mae'r llywodraeth yn helpu busnesau.

Dywedodd Mr Jones: "Mae hwn yn gynllun i wneud i Gymru weithio drwy helpu pobl gael gwaith a chreu cyfleoedd gwaith.

"Bydd Llafur Cymru yn gefn i fenywod sy'n dychwelyd i waith ar ôl cael plant; yno ar gyfer pobl ifanc sy'n cael swydd am y tro cyntaf ac yno i fusnesau bach sef asgwrn cefn ein heconomi.

"Mae'r nod yn glir - mwy o swyddi a swyddi gwell. Gyda'n gilydd fe allwn wneud Cymru yn lle mwy llewyrchus fel ein bod i gyd yn gallu rhannu'r buddion," meddai.

"Nawr yw'r amser i adeiladau ar y lefelau uchaf erioed o fuddsoddiadau mewnol a lefel diweithdra sy'n gostwng. Byddwn yn achub ar y cyfle yma i adeiladau ar ein llwyddiannau o'r pum mlynedd diwethaf a datblygu Cymru fydd yn gryfach, gyda chysylltiadau gwell ac yn fwy unedig."

Cafodd maniffesto'r Blaid Lafur ei lansio mewn coleg yn Nant Garw, Rhondda Cynon Taf.

'Cynllun ar gyfer llewyrch'

• Creu 100,000 o brentisiaethau ar gyfer pobl o bob oed

• Darparu 30 awr yr wythnos o ofal plant di-dâl, 48 wythnos y flwyddyn, ar gyfer rhieni plant 3 a 4 oed sy'n gweithio

• Band llydan cyflym i bob eiddo yng Nghymru

• Torri trethi ar gyfer busnesau bychain

• Sefydlu "banc datblygu"