397 o ffoaduriaid o Syria wedi ailgartrefu yng Nghymru

Roedd rhai o'r ffoaduriaid sydd yng Nghymru yn ymweld â'r Eisteddfod Genedlaethol yn gynharach ym mis Awst

Yn ôl yr ystadegau diweddaraf gan y Swyddfa Gartref, mae o leiaf 397 o ffoaduriaid o Syria bellach wedi eu hailgartrefu yng Nghymru.

Roedd 21 o'r 22 awdurdod lleol yng Nghymru wedi derbyn ffoaduriaid o dan gynllun Ailgartrefu Pobl Bregus Syria gan Lywodraeth y DU erbyn diwedd Rhagfyr y llynedd.

Mae rhai cynghorau wedi cael eu beirniadu am fod yn araf yn ailgartrefu pobl.

Daeth croeso i'r ffigyrau gan elusen Oxfam Cymru.

Dywedodd Matthew Hemsley ar ran yr elusen: "Mae gan Gymru hanes balch o groesawu pobl mewn angen ac mae'n bwysig gweld y traddodiad yna'n parhau."

Yn ail hanner 2016 y daeth y mwyafrif o ffoaduriaid i Gymru, sef 285. Mae cyfanswm y ffoaduriaid i gael eu derbyn i'r DU yn 5,454.

Yng Nghymru, mae'r nifer o ffoaduriaid i gael eu derbyn gan y cynghorau unigol fel a ganlyn:

• Ynys Môn - 4;

• Blaenau Gwent - 10;

• Pen-y-bont ar Ogwr - 6;

• Caerffili - 12;

• Caerdydd - 26;

• Sir Gaerfyrddin - 33;

• Ceredigion - 23;

• Conwy - 3;

• Sir Ddinbych - 5;

• Sir y Fflint - 5;

• Gwynedd - 12;

• Merthyr Tudful - 8;

• Sir Fynwy - 15;

• Castell-nedd Port Talbot - 52;

• Casnewydd - 10;

• Sir Benfro - 0;

• Powys - 44;

• Rhondda Cynon Taf - 34;

• Abertawe - 45;

• Torfaen - 15;

• Bro Morgannwg - 15;

• Wrecsam - 20.