Pencampwriaeth y Chwe Gwlad: Cymru 22-9 Iwerddon
- Cyhoeddwyd
Yn eu gêm gartref olaf ym mhencampwriaeth y chwe gwlad eleni, ennill oedd hanes Cymru yn erbyn Iwerddon nos Wener.
Llwyddodd Cymru i oroesi'r pwysau gan flaenwyr Iwerddon yn yr ail hanner i sicrhau buddugoliaeth gampus yn eu herbyn.
Roedd Stadiwm Principality yn llawn dop gyda chefnogwyr Cymru yn edrych am welliant ers y perfformiad siomedig yn ail hanner y gêm yn erbyn yr Alban.
Roedd Cymru dan bwysau o'r munud cyntaf a'r Gwyddelod aeth ar y blaen ar ôl chwe munud yn dilyn cic gosb lwyddiannus gan Johnny Sexton.
Fe wnaeth Cymru fywiogi ychydig ar ôl deg munud gan fygwth amddiffyn Iwerddon, ond fel mewn nifer o achosion yn ystod y bencampwriaeth eleni, roedd Cymru methu gwneud yn fawr o'r meddiant.
Daeth cais cyntaf y gêm wedi 20 munud.
George North, sydd wedi derbyn beirniadaeth gyhoeddus gan dîm hyfforddi Cymru yn ystod yr wythnos, dderbyniodd y bêl ar yr asgell.
Llwyddodd i dorri'n rhydd o dacl gan ddau chwaraewr Iwerddon cyn croesi dros y llinell gais. Methodd Lee Halfpenny gyda'r gic i ychwanegu at y pwyntiau.
George North yn sgorio cais cyntaf Cymru yn erbyn Iwerddon
Llwyddodd Paddy Jackson gyda chic gosb i wneud y sgôr yn 6-5 i'r Gwyddelod ar ôl 26 munud.
Ond munud cyn hanner amser fe aeth Cymru yn ôl ar y blaen, cic gosb lwyddiannus arall gan Halfpenny wedi i Johnny Sexton weld y garden felen i Iwerddon yn dilyn trosedd ar y llinell gais.
Roedd Cymru yn edrych yn beryglus yn ymosodol ac yn gryf yn ardal y dacl cyn i'r dyfarnwr Mr Wayne Barnes chwythu am hanner amser gyda'r sgôr yn 8 - 6 i Gymru.
Mantais i Gymru
Dechreuodd yr ail hanner yn berffaith i Gymru.
Croesodd George North am ei ail gais o'r gêm ar ôl 43 o funudau yn dilyn gwaith da gan y capten Alun Wyn Jones. Llwyddodd Lee Halfpenny gyda'r trosiad y tro hwn i wneud y sgôr yn 15-6 i Gymru.
Doedd Iwerddon heb ildio cais yn yr ail hanner mewn unrhyw un o'i gemau ym mhencampwriaeth y chwe gwlad eleni.
Fe dyfodd hyder yr ymwelwyr ar ôl i'r maswr Johnny Sexton ddychwelyd i'r cae.
Yn dilyn tacl uchel gan Dan Biggar ciciodd Sexton gic gosb hawdd i Iwerddon ar ôl 57 munud. Munud yn ddiweddarach roedd Biggar yn anlwcus pan darodd y postyn pan giciodd am gôl adlam.
Johnny Sexton oedd yn gyfrifol am gicio gwerth 6 o bwyntiau i Iwerddon
Roedd llif y gêm yn parhau'n gyflym wrth i Iwerddon bwyso am gais. Ond fe safodd amddiffyn Cymru yn gadarn wrth i Moriaty atal Sexton rhag croesi am gais i'r Gwyddelod.
Gyda chwaraewyr yn blino daeth cyfnod o eilyddio i'r ddau dîm gyda Jamie Roberts a Luke Charteris yn dod i'r cae i Gymru yn lle Scott Williams a Jake Ball.
Daeth Iwerddon yn agos i sgorio ac roedd y dorf yn credu bod Mr Barnes y dyfarnwr wedi rhoi cais i Iwerddon, ond daeth cadarnhad bod y Gwyddelod wedi troseddu drwy rwystro - hynny er rhyddhad i amddiffyn Cymru.
Gyda'r gêm yn dirwyn i ben llwyddodd Cymru i gadw disgyblaeth gan orfodi Iwerddon i wneud camgymeriadau.
Jamie Roberts yn croesi am y trydydd cais i Gymru
Jamie Roberts oedd y cyntaf i ymateb i gamgymeriad yn nwy ar hugain y Gwyddelod cyn croesi am drydydd cais Cymru ym munudau olaf y gêm.
Llwyddodd Halfpenny gyda'r gic a sicrhau buddugoliaeth gampus i Gymru o 22-9.
Gyda pherfformiad arbennig yn amddiffynnol bydd Cymru yn camu ymlaen i'r gêm nesaf yn erbyn Ffrainc yn llawn hyder a gadael gobeithion Iwerddon am y bencampwriaeth eleni yn deilchion.