Llofruddiaethau Clydach: Dim apêl yn achos David Morris

Mae David Morris yn y carchar am lofruddio Mandy Power, ei merched Katie ac Emily a'i mam Doris Dawson

Mae'r dyn a gafodd ei garcharu am lofruddio pedwar o bobl yng Nghlydach yn 1999 wedi clywed ei bod hi'n annhebygol y bydd ei achos yn cael ei ystyried yn y Llys Apêl.

Mae'r Comisiwn Adolygu Achosion Cyfreithiol wedi rhoi gwybod i David Morris bod penderfyniad i beidio cyfeirio'r achos ar gyfer apêl, er gwaetha' blynyddoedd o ymgyrchu gan ei deulu.

Cafodd y gŵr 54 oed ei garcharu am oes am lofruddio Mandy Power, ei dwy ferch fach - Katie, 10, ac Emily, wyth, - a'i mam 80 oed, Doris Dawson yn eu cartref yn 1999.

Mae Morris yn dal i fynnu ei fod yn ddieuog, ac mae ei gyfreithwyr wedi bod yn casglu tystiolaeth newydd er mwyn apelio.

Bu farw Mandy Power, ei merched Katie ac Emily, a'i mam Doris Dawson

Cafodd cyrff Mandy Power, Katie, Emily a Doris Dawson eu darganfod wedi tân yn eu cartref ar Kelvin Road yng Nghlydach.

Roedd y pedair wedi cael eu llofruddio gyda pholyn.

Yn 2006 cafwyd David Morris o Graigcefnparc yn euog o'u llofruddio mewn ail achos llys, ar ôl i'r dyfarniad gwreiddiol yn 2002 gael ei ddiddymu.

Dywedodd llefarydd ar ran y Comisiwn Adolygu Achosion Cyfreithiol eu bod nhw'n "dal i ystyried yr achos, ond bod Mr Morris wedi cael rhybudd dros dro na fydd ei achos yn cael ei anfon ymlaen at y panel apêl".

Mae gan ei gyfreithwyr ddau fis i gyflwyno gwybodaeth bellach allai, yn eu týb nhw, ddylanwadu ar y penderfyniad hwn.

Ychwanegodd y llefarydd: "Fodd bynnag, mae ganddo gyfle dros y deufis nesa i gyflwyno dadleuon eraill."