Cyhuddo pedwar ar ôl ymosodiad honedig ar fachgen ysgol

Dywedodd Ysgol Uwchradd Llyswyry fod disgyblion oedd yn rhan o'r ymosodiad honedig wedi wynebu'r "gosb fwyaf difrifol sydd ar gael"

Mae dyn a thri bachgen wedi cael eu cyhuddo yn dilyn ymosodiad honedig ar fachgen ysgol yng Nghasnewydd yn gynharach eleni.

Cafodd fideo ei rannu ar y cyfryngau cymdeithasol ym mis Mai, oedd yn ymddangos fel petai grŵp o blant yn ymosod ar ddisgybl o Ysgol Uwchradd Llyswyry, tra'i fod yn cael ei ddal gan ddyn.

Cafodd tri o bobl eu harestio ar y pryd, ac fe gadarnhaodd Heddlu Gwent ddydd Gwener fod pedwar o bobl bellach wedi cael eu cyhuddo mewn cysylltiad â'r achos.

Mae'r pedwar - dyn 31 oed a thri bachgen, 12, 13 a 14 oed - wedi'u cyhuddo o ymosodiad cyffredin.

Maen nhw wedi cael eu rhyddhau ar fechniaeth amodol, ac mae disgwyl iddyn nhw ymddangos yn y llys fis nesaf.

"Rydyn ni'n deall bod diddordeb mawr iawn wedi bod yn yr ymchwiliad yma," meddai'r Dirprwy Brif Gwnstabl Vicki Townsend.

"Mae'n allweddol bod pobl yn ystyried sut y gallai eu hiaith - yn enwedig sylwadau ar-lein - gael effaith ar ein gallu i wneud unrhyw un sy'n cael eu canfod yn euog o drosedd i fod yn atebol am hynny."

Dywedodd pennaeth Ysgol Uwchradd Llyswyry fis Mai fod disgyblion oedd yn rhan o'r ymosodiad honedig wedi wynebu'r "gosb fwyaf difrifol sydd ar gael".