Terfysg Llundain: Arestio dau ddyn arall yng Nghasnewydd

Mae dau ddyn arall wedi eu harestio yng Nghasnewydd mewn cysylltiad ag ymosodiad terfysgol yn Llundain yr wythnos diwethaf.

Cafodd y dynion, sydd yn 48 a 30 oed, eu harestio yng Nghasnewydd am tua 05:10 fore Mercher.

Daw hynny ar ôl i ddyn 25 oed gael ei arestio yn y ddinas ddydd Mawrth.

Mae'n golygu bod cyfanswm o bump o bobl wedi eu harestio gan yr heddlu sy'n ymchwilio i'r ffrwydrad yng ngorsaf Parsons Green.

Mae'r Swyddfa Gartref wedi gwrthod cadarnhau adroddiadau gan bobl yn yr ardal bod y tŷ yn cael ei ddefnyddio i gartrefu ceiswyr lloches.

• Parsons Green: Arestio dyn yng Nghymru

Fe ffrwydrodd y bom cartref yn rhannol ar drên tanddaearol yn yr orsaf ddydd Gwener, gan achosi mân anafiadau i 30 o bobl.

Ddydd Sadwrn, cafodd dyn 18 oed ei ddal ym mhorthladd Dover, ac fe gafodd dyn 21 oed ei arestio yn Hounslow, Llundain.

Mae'r heddlu wedi cau rhai strydoedd wrth i'r ymchwilio barhau

Dywedodd yr heddlu bod swyddogion o Heddlu'r Met, Heddlu Gwent ac uned gwrthderfysgaeth Cymru wedi bod yn rhan o'r cyrch fore Mercher.

Mae swyddogion yn dal i chwilio mewn dau leoliad yng Nghasnewydd fel rhan o'r ymchwiliad.

Dywedodd Swyddog gyda Heddlu'r Met, Dean Haydon: "Mae hyn yn parhau i fod yn ymchwiliad sy'n symud yn gyflym.

"Mae llawer o weithgarwch wedi bod ers yr ymosodiad ddydd Gwener.

"Erbyn hyn mae gennym bump o ddynion yn y ddalfa ac mae archwiliadau'n parhau mewn pedwar cyfeiriad."

Profiad llygad dyst

Dywedodd llygad dyst oedd ddim eisiau cael ei henwi iddi weld gweithgarwch ar y stryd yn ystod oriau man y bore.

"Tua 05:30 bore ma nes i weld ceir heddlu gyntaf ac wedyn ceir ditectif, tua saith car ditectif a tua thri char heddlu a fan terfysg yn dod fyny'r stryd ac yn parcio yn hamddenol. Fe aethon nhw mewn i'r tŷ tua 06:00."

"I ddechre o'n i'n meddwl bod rhywun wedi cael ei llofruddio neu rywbeth. Mi odd e jest yn normal iawn. Doedd yna ddim brys, dim byd. Mi odd e fel eu bod nhw wedi cael eu galw i'r tŷ. Mi odd fforensig yna ar yr un pryd."