Terfysgaeth: Rhyddhau dyn 48 oed o Gasnewydd

Mae Heddlu'r Met wedi cadarnhau fod dyn 48 oed gafodd ei arestio mewn cysylltiad â'r ymosodiad terfysgol yn Llundain wedi ei ryddhau heb gyhuddiad.

Cafodd y dyn ei arestio yn dilyn cyrch yng Nghasnewydd ddydd Mawrth.

Cafodd 30 o bobl eu hanafu wedi i ddyfais ffrwydro ar drên tanddaearol yng ngorsaf Parsons Green ddydd Gwener.

Roedd cyfanswm o chwech o bobl wedi'u harestio mewn cysylltiad â'r ymosodiad, ond mae dau ohonynt bellach wedi eu rhyddhau ar ôl i ddyn 21 oed gafodd ei arestio yn Hounslow hefyd gael ei ryddhau heb gyhuddiad.

Mwy o amser holi

Yn ogystal â'r dyn sydd wedi ei ryddhau, cafodd dau ddyn arall eu harestio yng Nghasnewydd ddydd Mawrth a dydd Mercher.

Ddydd Iau cafodd Heddlu'r Met ragor o amser i holi'r dynion 25 a 30 oed sy'n parhau yn y ddalfa.

Daeth i'r amlwg ddydd Iau fod y tŷ yng Nghasnewydd gafodd ei archwilio gan heddlu ddydd Mawrth yn cael ei reoli gan gwmni sydd â chytundeb â'r Swyddfa Gartref i ddarparu llety i geiswyr lloches.

Mae BBC Cymru wedi gweld archifau gwladol sy'n dangos mai Clearsprings Ready Homes sy'n rheoli'r adeilad.

Mae Clearsprings wedi gwrthod gwneud sylw ar y mater, gan gyfeirio unrhyw gwestiynau at y Swyddfa Gartref, sydd hefyd wedi dweud nad ydynt am wneud sylw.

Mae'r archifau yn dangos bod gan y tŷ - sy'n gallu cartrefu pump o bobl - landlord o Gasnewydd ac mai Clearsprings yw'r asiant.

Yn 2012 fe wnaeth y cwmni o Essex arwyddo cytundeb newydd pum mlynedd gyda'r Swyddfa Gartref i ddarparu llety a thrafnidiaeth i geiswyr lloches.

Mae ganddo gytundeb gwerth £119m i ddarparu'r holl lety ar gyfer ceiswyr lloches yng Nghymru.

Ffrindiau'n 'methu credu'

Mae ffrinidau i'r dyn cyntaf a gafodd ei arestio yng Nghasnewydd mewn cysylltiad ag ymosodiad Parsons Green yn dweud nad ydyn nhw'n gallu credu fod ganddo unrhyw beth i'w wneud â'r digwyddiad.

Cafodd y dyn 25 oed, sy'n cael ei 'nabod yn lleol fel Bilal, ei arestio ar Stryd Glebe yn y ddinas am 19:00 nos Fawrth.

Aeth yr heddlu ymlaen i archwilio ei dŷ ar Stryd Jeffrey.

Cadarnhaodd ei ffrindiau fod y peintiwr yn defnyddio cyfrif Facebook dan yr enw Mahdi Rahimi.

Mae'r dyn sy'n cael ei adnabod fel Bilal yn lleol, ac yn defnyddio'r enw Mahdi Rahimi ar ei gyfrif Facebook, yn parhau i fod yn y ddalfa

Dywedodd un o'i gyfeillion ei fod wedi cyrraedd Casnewydd yn 2009.

"Dwi'n ei nabod ers iddo gyrraedd yma.

"Mae'n ddyn da iawn, fedra i ddim credu hyn.

"Dyn Cwrdaidd yw e, mae'n disgrifio terfysgwyr fel Isis fel pobl dwp."

Dywedodd person arall fod pawb yn ei adnabod: "Doedd e ddim yn dawel neu'n cadw iddo'i hun, roedd pawb yn ei adnabod yma.

"Cwrd yw e, fyddai e ddim yn cael dim i'w wneud ag Isis."