Bale allan o gemau Georgia ac Iwerddon gydag anaf i'w goes

Gareth BaleHuw Evans picture agency

Mae Gareth Bale allan o'r ddwy gêm ragbrofol Cwpan y Byd yn erbyn Georgia nos Wener, 6 Hydref, a Gweriniaeth Iwerddon ar nos Lun 9 Hydref.

Mae Cymdeithas Bêl-Droed Cymru wedi cadarnhau'r newyddion mewn datganiad na fydd Bale yn holliach.

Fe wnaeth Bale ddioddef anaf i'w goes wrth chwarae i'w glwb Real Madrid yng Nghynghrair y Pencampwyr yn erbyn Borussia Dortmund nos Fawrth.

Mae Cymru yn ail yng Ngrŵp D gyda 14 o bwyntiau, pedwar pwynt y tu ôl i Serbia sydd ar y brig.

Nid yw’r post yma ar Twitter yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Twitter.
Nid yw'r BBC yn gyfrifol am gynnwys safleoedd allanol
I osgoi neges twitter gan Wales

Caniatáu cynnwys Twitter?

Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Sgan ar ei goes

Fe wnaeth Bale gyrraedd Caerdydd ddydd Sul i ymuno â gweddill y garfan cyn mynd i ginio Gwobrau Pêl-droed Cymru nos Lun.

Ni wnaeth chwarae i Real Madrid yn eu gêm yn erbyn Espanyol dros y penwythnos.

Ond yn dilyn trafodaeth gyda Real Madrid, fe gafodd ei anfon am sgan ar ei goes, ac yn dilyn hynny daeth y newyddion na fydd ar gael i'r un o'r ddwy gêm.

Mae Cymru wedi galw Tom Bradshaw o glwb Barnsley i'r garfan yn ei le.

Does dim angen anobeithio, medd Owain Llŷr

Yn ôl golwr Cymru, Owain Fôn Williams fe fydd Bale yn golled fawr i'r tîm ond mae digon o chwaraewyr eraill yn y garfan allai gamu i'r adwy.

"Mae'n mynd i fod yn gyfle i bwy bynnag sy'n chwarae yna, os ydy o am roi Hal [Robson-Kanu] yna, neu os 'di o'n mynd i chwarae Ben [Woodburn] neu Tom [Lawrence]," meddai wrth BBC Cymru Fyw.

"Mae 'na ddigon o opsiynau yna, ond does na'm doubt ti'n mynd i golli Bale, does dim dwywaith am hynny."

Yn ôl Joe Allen, dyw anaf Gareth Bale heb effeithio hyder y garfan wrth iddyn nhw baratoi i herio Georgia ac Iwerddon

Ychwanegodd: "Mae'n gallu 'neud unrhyw beth ar y cae 'na pan mae o'n ffit, felly yn sicr 'dan ni'n mynd i golli hynny - 'dan ni'n siarad am Gareth Bale a Chymru'n ei golli o, ac mae hynny'n anferth i ni fel gwlad.

"Ond mi gafon ni ganlyniad go lew yn Serbia yn yr haf a doedd o'm yn chwarae honno, felly mae'n dangos i chdi fod genna ni ddyfnder yn y garfan a hogiau'n gallu camu mewn i'w safle fo."

Straeon perthnasol