West Brom yn diswyddo'r Cymro Tony Pulis fel ei rheolwr

Roedd Tony Pulis yn reolwr ar West Brom ers 2015

Mae'r Cymro Tony Pulis wedi cael ei ddiswyddo fel rheolwr West Bromwich Albion yn Uwch Gynghrair Lloegr.

Roedd Pulis, sy'n dod o Billgwenlli ger Casnewydd, wedi bod yn rheoli West Brom ers 2015.

Mae Pulis yn enw sy'n cael ei gysylltu gyda swydd rheolwr Cymru gan rai, ers i Chris Coleman ymddiswyddo wedi bron i chwe blynedd yn y rôl.

Dydy West Brom heb ennill gêm ers 22 Awst eleni, ac ers hynny maen nhw wedi cael pedair gêm gyfartal a cholli saith.

Dywedodd Pulis wedi'r golled o 4-0 yn erbyn Chelsea ddydd Sadwrn na fyddai'n "synnu os caiff ei ddiswyddo".