Cyhoeddi dyddiad y briodas fawr ym mis Mai 2018

Mae ysbïwyr craff Cymru Fyw wedi llwyddo i ddarganfod union ddyddiad y briodas fawr ym mis Mai 2018.

Gallwn ni gadarnhau mai ar 19 Mai 2018 y bydd Iona Teleri Jones, nyrs o Ddinbych, yn priodi'r dyn busnes lleol Iwan Roberts yng Nghapel y Fron.

Mae'r teuluoedd yn awyddus i gadarnhau mai nhw fydd yn talu am y briodas, y trafnidiaeth, y dillad, y brecwast priodas a'r parti nos, er 'dyw hi ddim yn hollol glir pwy fydd yn gyfrifol am y bil diogelwch.

Bydd y brecwast yn cael ei gynnal ar dir fferm teulu'r briodferch ger pentref Llansannan, ac mae disgwyl y bydd trigolion lleol ardal Dinbych yn dod yn eu miloedd i wylio'r dathliadau.

Parch

Mae teuluoedd y ddau wrth eu bodd gyda'r newyddion, ond maen nhw'n gofyn i'r cyhoedd barchu'u preifatrwydd ar y diwrnod mawr.

Ydych chi'n priodi ym mis Mai 2018? Cysylltwch gyda ni, gyda llun.

Cyfeiriad e-bost: cymrufyw@bbc.co.uk

Twitter: @BBCCymruFyw neu fedrwch chi gysylltu ar ein tudalen Facebook.