Cyhuddo dyn o achosi marwolaeth mam feichiog ar yr M4

Bu farw Rebecca Evans yn dilyn gwrthrawiad ar yr M4 ym mis Tachwedd 2016

Mae dyn wedi cael ei gyhuddo o achosi marwolaeth mam feichiog trwy yrru'n beryglus yn dilyn gwrthdrawiad ar yr M4 ym mis Tachwedd y llynedd.

Bu farw Rebecca Evans a'r baban yn y groth yn y digwyddiad rhwng tri char ger Margam, Castell-nedd Port Talbot ar fore 29 Tachwedd 2016.

Roedd Mrs Evans, 27 oed o Ben-y-bont, yn teithio gyda'i gwr Alex, a'i mab dwy oed, Cian, ar y pryd.

Mae Craig John Scott, 51 oed o ardal Y Mynydd Bychan, Caerdydd, hefyd wedi'i gyhuddo o achosi anafiadau difrifol trwy yrru'n beryglus.

Cafodd Cian hefyd ei gludo i'r ysbyty gydag anafiadau difrifol.

Mae disgwyl i Mr Scott ymddangos yn Llys y Goron Abertawe ar 22 Rhagfyr.