Gwleidyddion o Gymru 'ddim am siarad eto ar RT'

Mae gwleidyddion o Gymru wedi dweud na fyddan nhw'n ymddangos ar sianel deledu Rwsiaidd RT am y tro.

Dywedodd y Ceidwadwr David TC Davies ac arweinydd UKIP Cymru, Neil Hamilton, sydd wedi bod ar RT yn y gorffennol, na fyddan nhw'n gwneud eto.

Daw hynny wedi i'r Prif Weinidog Theresa May ddweud ei bod hi'n "hynod o debygol" mai Rwsia oedd yn gyfrifol am wenwyno'r cyn-ysbïwr Sergei Skripal yr wythnos diwethaf.

Mae un o ACau blaenllaw Plaid Cymru wedi dweud y bydd y blaid yn "adolygu" eu hymddangosiadau ar y sianel.

Boicot

Dywedodd Adam Price, sydd wedi bod ar RT yn y gorffennol, mai'r peth doeth oedd gadael i reoleiddwyr y diwydiant benderfynu a oedd y sianel yn un addas ai peidio.

Ymhlith y gwleidyddion eraill o Blaid Cymru sydd wedi ymddangos ar y sianel mae'r ASau Hywel Williams, Liz Saville-Roberts a Jonathan Edwards, a'r AC Simon Thomas.

Mae RT, oedd yn arfer cael ei hadnabod fel Russia Today, yn sianel sy'n derbyn cefnogaeth gan y Kremlin ac yn darlledu ar Freeview yn y DU.

Ddydd Llun fe wnaeth AS o Gymru alw ar gydweithwyr i foicotio'r sianel yn dilyn digwyddiad yng Nghaersallog.

Mae Mr Skripal, 66, a'i ferch Yulia, 33, mewn cyflwr difrifol yn yr ysbyty

Fe gafodd Mr Skripal a'i ferch, Yulia eu darganfod yn anymwybodol yn y ddinas ar 4 Mawrth.

Dywedodd AS De Caerdydd a Phenarth, Stephen Doughty y dylai trwydded ddarlledu RT hefyd gael ei hatal.

Mae'r gwleidyddion eraill o Gymru sydd wedi ymddangos ar RT yn cynnwys ASE UKIP yng Nghymru, Nathan Gill, a'r cyn-arweinydd Llafur Neil Kinnock.

Ddydd Mawrth fe wnaeth mab Mr Kinnock, Stephen - sef AS Llafur Aberafan - alw am symud neu ohirio Cwpan y Byd 2018 yn Rwsia yn dilyn gwenwyno Mr Skripal.

Rheoleiddwyr

Pan ofynnwyd i Mr Price ddydd Mawrth a fyddai gwleidyddion Plaid Cymru'n stopio ymddangos ar y sianel yn y dyfodol, dywedodd y byddai hynny'n cael ei "adolygu".

Ychwanegodd y byddai gwrthod siarad ag RT yn golygu "tynnu'ch hun allan o fforwm cyhoeddus".

"Dwi wedi cael materion yn codi gyda'r BBC fel darlledwr," meddai.

"Dwi ddim yn siŵr a yw'r BBC yn hollol ddiduedd ar adegau, ond dwi dal yn ymddangos ar y BBC.

"Yn fy marn i, cyn belled â bod ganddyn nhw drwydded i ddarlledu, wedyn fy nyletswydd i fel gwleidydd etholedig yw cyflwyno fy achos mewn fforwm sydd yn gyfreithlon dan y rheolau.

"Achos fel arall ychydig iawn o gyfryngau dwi'n teimlo'n hollol gyfforddus gyda nhw yn fy marn bersonol i."

Dywedodd Adam Price y byddai Plaid Cymru'n adolygu eu polisi ar RT

Dywedodd Mr Davies, sydd wedi cael ei dalu i ymddangos ar raglen ddychan ar y sianel, na fydd yn "ymddangos yn fwriadol ar RT ar ôl beth ddigwyddodd yng Nghaersallog o ganlyniad i'r cyswllt sydd bron yn sicr" gyda Rwsia.

Ychwanegodd Mr Hamilton na fyddai'n ymddangos ar y sianel chwaith "yn y dyfodol agos", ac mai ond ddwywaith yr oedd wedi gwneud o'r blaen.

Mewn datganiad dywedodd llefarydd ar ran Ofcom: "Rydym wedi clywed datganiad y Prif Weinidog ac rydym yn disgwyl datganiad pellach ddydd Mercher.

"Yna fe fyddwn yn ystyried goblygiadau trwydded ddarlledu RT."