£56m i wella amddiffynfeydd llifogydd yng Nghymru

Mae Llanberis yng Ngwynedd yn un o'r ardaloedd sydd wedi profi llifogydd dros y blynyddoedd diwethaf

Mae Llywodraeth Cymru wedi cyhoeddi eu bod yn buddsoddi £56m i atgyfnerthu amddiffynfeydd llifogydd ac arfordirol ar draws Cymru.

Bydd yr ardaloedd fydd yn elwa o'r rhaglen - Rheoli Perygl Llifogydd ac Erydu Arfordirol - yn cael eu blaenoriaethu ar sail risg gan ystyried ffactorau fel tebygolrwydd ac effaith llifogydd a digwyddiadau blaenorol.

Mae'r llywodraeth yn disgwyl i dros 6,500 o adeiladau elwa o'r cynlluniau fydd yn cael eu gweithredu dros y flwyddyn nesaf.

Bydd awdurdodau lleol a Chyfoeth Naturiol Cymru hefyd yn derbyn cyllid ar gyfer cyflwyno cynlluniau rheoli perygl llifogydd er mwyn gwarchod pobl, eiddo a busnesau.

Y gobaith yw y bydd manteision ehangach ynghlwm wrth lawer o'r cynlluniau gan gynnwys gwelliannau i gynefinoedd, manteision o ran hamdden a lleihau perygl i'r seilwaith.

Lle fydd yn elwa?

Ymysg y cynlluniau newydd fydd yn cychwyn mae:

• Amddiffynfeydd llifogydd Machynys yn Llanelli;

• Lecwydd yng Nghaerdydd;

• Gwaith ar lanw'r afon yn Nhregatwg;

• Llansannan a Mochdre yng Nghonwy;

• Llanberis yng Ngwynedd;

• Llanmaes ym Mro Morgannwg;

• Parc yr Onnen yn Aberystwyth;

• Cronfa Ddŵr Llyn Tegid, Gwynedd.

Dywedodd y gweinidog Hannah Blythyn ei bod yn gwarchod cyllideb atal llifogydd Cyfoeth Naturiol Cymru

Dywedodd Gweinidog yr Amglchedd, Hannah Blythyn, AC: "Rydym yn buddsoddi mewn cynlluniau newydd a gwaith cynnal a chadw ar raddfa fawr ar draws Cymru.

"Rwyf hefyd wedi gwarchod cyllideb Cyfoeth Naturiol Cymru ar gyfer gweithgareddau rheoli perygl llifogydd dros y flwyddyn ariannol nesaf, ac wedi ymrwymo i gyllido Canolfan Monitro Arfordirol newydd Cymru a fydd yn gwella ein dealltwriaeth o brosesau arfordirol ac yn cyfrannu at well penderfyniadau."