Marwolaeth carchar Wrecsam yn gysylltiedig â chyffuriau

Agorodd Carchar Berwyn ym mis Chwefror 2017

Mae gwrandawiad crwner wedi clywed fod marwolaeth carcharor yn Wrecsam yn gysylltiedig â defnyddio'r cyffur Spice.

Fe ddaeth swyddogion o hyd i Luke Jones, 22 oed o Flaenau Ffestiniog, wedi marw yng Ngharchar Berwyn ar benwythnos y Pasg.

Yn Rhuthun ddydd Llun, dywedodd Crwner Dwyrain a Chanolbarth Gogledd Cymru, David Pojur, bod y patholegydd wedi nodi achos dros dro'r farwolaeth fel digwyddiad cardiaidd difrifol yn gysylltiedig â defnyddio Spice.

Daw hynny'n dilyn archwiliad post mortem.

Fe gafod y cwest ei agor a'i ohirio yn Neuadd y Sir ddydd Llun, ac fe fydd archwiliadau pellach yn cael eu gwneud cyn y gwrandawiad nesaf.

• Carchar Berwyn: 'Angen gwell amddiffyn'

• Ymchwilio i farwolaeth mewn carchar

Aeth y crwner ymlaen i ddweud bod Mr Jones wedi ei ganfod yn anymwybodol yn ei gell am 18:08 ar 31 Mawrth.

Cafodd ei gludo'n syth i Ysbyty Maelor Wrecsam, lle bu farw'n ddiweddarach.

Bydd cwest yn cael ei gynnal maes o law, a bydd rhag-wrandawiad yn cael ei gynnal yn y cyfamser, ond ni chafodd dyddiadau eu pennu.

Dywedodd Mr Pojur y bydd yr Ombwdsman Carchardai hefyd yn cynnal ymchwiliad.